袁文傑被王征揸手求約會

王徵入主亞視後，搞到翻天覆地，最近的桃色新聞，更令人咋舌。先有「用完即棄」梁景煌（Tommy）爆大鑊，昨日有報導指人夫姜皓文都是受害者，最終被迫離開亞視。原來高大威猛的袁文傑，在離開亞視3年之前，早已被即將進駐亞視的王征睇中，王征安排袁文傑到上海陪睇崑曲，之後又約會袁文傑單獨見麵食飯，更即場傳短訊約文傑「上去飲嘢」，王征十分主動，嚇得袁文傑慌忙逃脫。

袁文傑指王征（圖）曾傳短訊約「飲嘢」。

資料圖片
握到唔願放手

袁文傑先提到人夫姜皓文在2012年北京台慶騷中招，他昨在電話中大笑說：「我嗰次有去，上下其手我睇唔到，可能人太多，哈哈哈！」然後憶述發生在自己身上的經歷，他說：「我諗我係成個亞洲電視藝員，係第一批觸王征先生，因為有一年唔知佢係咪睇完我哋亞姐之後，突然公司叫我上上海睇一個崑曲藝術表演，我係莫名其妙，睇完之後，當時查生（亞視股東查懋聲）都喺度，介紹咗王征先生認識，然後一齊食飯，記得握手嗰時佢係好似有啲唔願放手咁，另外喺我返到房，就見到酒店房間地下有張紙，原來係佢（王征）嘅電話號碼，佢要攞我電話號碼唔難，但係……其實畀張咭片我咪得囉！」

王征之後來港再邀約袁文傑單獨見面，不過文傑帶同另一位同事出席飯局，他說：「跟住之後返到香港冇幾耐，佢又再約我食飯，佢淨係叫我去，但係我叫埋藝員部同事去，我當係高層活動，嗰餐飯都有啲得意嘢，我哋同枱食飯，突然間手機有個訊息傳過嚟，原來係佢（王征），問我：『食完飯可唔可以一齊上去飲嘢？』，我冇應約，睇完個訊息之後，我望一望佢，佢又好得意咁望一望我，係好得意嘅眼神嚟㗎！跟住咪當冇嘢繼續食飯。」

姜皓文和林韋辰等資深亞視男藝人都先後離開亞視。資料圖片
大家庭精神不再

袁文傑直認當年傾續約獲加薪，仍堅決離開，是不想違背自己良心，他說：「當年每個人傾約減，係我加，但係我都選擇走，因為裡面整體氣氛有啲怪，亞視大家庭個精神已經唔同，呢個係我唔願意見到。」

採訪：楊潔雯
from:http://hk.apple.nextmedia.com/entertainment/art/20150116/19003912

王暢被爆曾穿上紅黑泳褲與王征遊船河，大晒身材。互聯網圖片
【ATV告急之船河派對】王征自入主亞視後搞到翻天覆地，其私生活更令人咋舌。早前憑《亞洲星光大道》出身的梁景煌爆大鑊，踢爆王征喜好之餘，為求一紙藝員合約跟對方發展關係，二人曾在王征深圳寓所約會。雖然王征事後耍手否認說：「我都唔知乜事。」但其桃色新聞卻越揭越多，之後再被爆曾對黑仔姜皓文和袁文傑毛手毛腳，又傳逼亞姐去飯局，緋聞、是非沒完沒了。

去年十月，王征曾在社交網站分享在遊艇上嘆世界的照片。互聯網圖片

王暢穿上恤衫西褲在船上似影沙龍，背景與王征的遊艇極相似。互聯網圖片
似半個男主人

今年已經五十二歲的王征，人到中年仍好鍾意嫩口、高大、靚仔及身材健碩的男士，據悉他的「新寵兒」是應屆的亞洲先生亞軍、來自廣東的王暢，兩人關係早已傳遍亞視人，只是大家忍口不談。去年十月，當王暢得獎後即獲王征邀約飯局，兩人可謂一拍即合，之後好多亞視私人活動都與王征有影皆雙。去年十一月，王征邀請一班亞生、亞姐上遊艇耍樂，王暢以半個男主人身份出現，之後更在facebook自貼出遊船河相，似在宣示主權。

王暢去年得亞洲先生亞軍，王征亦有上台祝賀。資料圖片

同款白色梳化

當日王暢以一身斯文打扮、穿上恤衫西褲登上船，之後脫掉外衣，換上紅黑泳褲即chok王上身，gel了一個七十年代、胡楓式蛋撻頭，還有四哥謝賢最愛的黑超。年屆三十歲的王暢操到好弗，大騷八嚿爆肌身材，而且激凸下體更成亮點，他的相片從多角度拍攝，擺明是有人替他影「沙龍」。而其中一張王暢倚在白色巨型大梳化上，跟王征去年十月在微博自貼在遊艇梳化上的相片如出一轍，親密關係似乎打風都打唔甩。

採訪：舒娜
from:http://hk.apple.nextmedia ... 150124/19013656

鮑姐回憶往日無限好，不禁感觸落淚。

【ATV告急之老鬼傷心】亞視困局未解，不得不承認現在影圈多位猛人想當年都是從這個娘家栽培出來，現年六十五歲的影后鮑起靜，一九七九年加入麗的電視，經歷過改朝換代，由閒角磨練登上主角，即使大前年離巢，但她對娘家始終有情意結，前日訪問談到亞視將臨清盤，「亞視之寶」鮑姐激動到喊了出來。

亞視之寶鮑姐服務亞視逾三十年，看着娘家又起又落，非常感慨。

攝影：葉君海
「點解亞視搞成咁」

近日亞視拖欠員工薪金，為安定軍心，推出節目《ATV這一家》匯報最新情況，鮑姐卻婉拒做嘉賓，她直認事出有因：「此時此刻，我心中真係難過，叫我上去講乜嘢呢？回憶亞視以前所有好，呢啲好多人都知，對我嚟講好大感慨，點解亞視搞成咁，究竟係邊個嘅錯，撫心自問，留守到今日嘅同事同藝人冇錯，佢哋對公司問心無愧，好大問題係啲領導同老闆，每換一個就為員工帶來希望同失望，不斷循環令大家傷心。如果我上到節目，我會忍唔住鬧佢，所以最後冇上。」

對於亞視七朝天子，鮑姐最欣賞林百欣和封小平：「佢哋入場真係有大事改革，好有心。」及至王征接棒，負面新聞不絕，甚至傳出他騷擾男藝人，鮑姐揶揄：「佢真係有啲騎呢，佢唔識搞一間電視台，糊裏糊塗就嚟咗。」鮑姐同情亞視執行董事葉家寶撐着這個爛攤子，她說：「我對家寶寄語無限同情，佢盡心盡力為亞視，眼淚、痛苦往心裏流，今時今日一個人撐住，仲堅持搞個人人都鬧爆打氣騷，雖然當晚我冇參與，但我都要衷心向留守最後嘅藝人拍掌。」講到這裏，鮑姐開始眼紅紅，並用紙巾拭淚，看出她對亞視是「愛之深，責之切」。

鮑姐揶揄王征為人騎呢，在他的領導下沒作為。資料圖片

對於現時亞視仍有藝人默默工作，鮑姐衷心向他們拍掌。資料圖片
王維基擦身而過

鮑姐希望快快出現「白武士」拯救亞視，她說：「最初聽到英皇楊生（楊受成）有興趣買，佢係適合人選，佢有能力同團隊去令亞視起死回生，其次就係港視王維基，可惜兩次機會都擦身而過，惟有期望另有『白武士』出現，希望到時政府都出一分力幫吓亞視。」

採訪：比華利
場地：西苑酒家
from:http://hk.apple.nextmedia ... 150131/19023097