鄭嘉穎除夕夜和排球美少女莎賓娜出席完活動後，衫都沒有換就到夜店咀女。資料圖片
城中筍盤王之一的鄭嘉穎早前傳與佘詩曼翻撻，繼而又傳有上海女友，但他一一否認。不過，昨日有報導圖文並茂嘉穎於夜店跟長髮女連環咀嘴，報導指嘉穎出席完除夕倒數活動後，到中環Dragon-i消遣，其間嘉穎對一長髮巨咪女極為嗒糖，除攬腰和咬耳仔外，飲到腳步浮浮的嘉穎更跟長髮女連咀三次。另外，阮民安（Tommy）當晚亦有在場，報導指Tommy主動介紹女仔給嘉穎認識，初時雙方都有講有笑，惟其後未知何事雙方竟發生口角，Tommy一度當眾爆粗及跟嘉穎有碰撞。
Tommy借醉冇回應
記者昨致電嘉穎瞭解，他說：「我都咁大個，𠵱家係單身，我都希望識到個人陪我，呢個係好正常發展，希望大家畀番啲空間我，唔好咁快嚇到人哋，如果唔係我都好難搵到老婆。」至於場內跟Tommy發生口角和碰撞，嘉穎說：「冇呢回事，冇同任何人發生口角，亦冇發生碰撞。」
阮民安昨日否認在夜店和嘉穎口角，聲稱當晚飲得很醉。資料圖片
鄭嘉穎未有否認咀大胸女，更希望有空間發展。資料圖片
至於Tommy昨被問到是否跟嘉穎嘈交時，他在電話中說：「唔記得，醉咗，新年快樂！嗰晚好多人，其實自己少咗出去蒲，嗰晚飲醉咗，冇乜回應。」跟嘉穎是否熟絡？Tommy謂：「大家都識，見面飲嚇酒。」是否介紹女仔給嘉穎認識？Tommy謂：「邊有咁得閒介紹女畀佢識，唔記得細節啦。」那麼兩方是否爆粗？Tommy說：「邊有爆粗！可能大聲講嘢啩。」Tommy還聲稱自己一早醉倒，所以未見到嘉穎攬女錫女。
採訪：鍾國仁、皓騫
from:
http://hk.apple.nextmedia.com/entertainment/art/20150110/18997209
