榮升男神的王宗堯視愛貓為心頭肉，更自嘲似貓奴。
攝影：陳志嵐
【動愛寵】近期憑港視劇《選戰》躋身男神行列的王宗堯，吸引妹豬的電力毋庸置疑，原來他家中亦有兩位貓界小男神，是同樣八個月大的8仔及Tigger。王宗堯自認是貓人，希望將來的女伴愛他之餘，同樣愛貓，各位貓系妹豬，收到未？
日前，男神王宗堯帶同兩位小男神8仔及Tigger接受訪問，細心的王宗堯為牠們準備自家水兜及大量玩具，但生性怕醜的Tigger似乎不多領情，四圍亂竄，更搞笑躲到梳化後面，要王宗堯又抱又錫才能稍稍安撫。
為測試兩位小男神的電力如何，8仔和Tigger接受了氣球靜電測驗，可惜牠們竟然一個都吸不到，王宗堯無奈說：「話晒你哋都係小男神喎。可能佢哋好少出街，平日喺主場會叻啲，有朋友上嚟屋企都會主動撩人玩。」王宗堯指相對養狗，養貓比較配合娛樂圈生活方式，他說：「佢哋可以自己喺屋企，唔使出街，好方便打理，而且以前女朋友鍾意貓，自己搬咗屋之後終於有機會養。」
王宗堯坦言為兩隻寶貝貓，會盡量留在香港工作。
王宗堯的愛貓接受氣球靜電測驗，竟一個氣球都吸不到。
8個月大的Tigger不時左匿右閃，十分怕醜。
揀女友要愛貓
王宗堯的8仔及Tigger是領養的，原本他只是暫養，後來索性成為牠們的主人，王宗堯更視牠們為心頭肉，他說：「有佢哋真係變咗貓奴，同事叫我唱K都要返去睇吓佢哋先，點知抱抱吓就瞓咗，搞到我唔敢郁，腳痹都唔敢郁。佢哋真係好可愛，會叫我起身，會同我一齊瞓，最搞笑係佢哋趁我瞓咗幫我個Hi-Fi轉歌，仲校埋大細聲㖭。不過有次都真係好驚，因為𠵱家個屋主覺得唔靚唔想裝窗網，有日起身個心突然離一離，原來8仔爬緊上最高隻氣窗，𠵱家都諗緊點解決。」
他坦言因為兩隻寶貝貓，工作都盡量留在香港：「行開一日都好掛住，如果第時真係要離開香港一段時間，希望到時有女朋友，兩公婆輪流照顧。」
採訪：盧妹
from:
http://hk.apple.nextmedia ... 150106/18992442
