現年35歲的前歌手蔡雪敏（小雪）經歷過兩段失敗婚姻，首任老公、永安旅遊前太子爺陳迅元被爆偷食「大乳牛」蔡慧敏，離婚收場。08年小雪帶女兒Ronni再嫁，第二任陳姓老公為澳洲籍華人，家族在澳洲有四間酒樓，兩人育有一子。還以為小雪終覓得好歸屬，怎料兩人原來只是掛名夫妻，小雪於今年3月再度離婚，並自爆忍受老公偷食多年，怒斥：「壞人總有一天會得到他的報應！」
小雪現於澳洲獨力照顧一對同母異父子女，雖然離鄉別井，但樂在其中，不時在微博貼上與小朋友的開心家庭相；直至昨日家庭照中竟發現新成員，原來是與小雪拍拖近半年的韓國男友Robin Cheung。小雪的新歡外貌有點似王浩信，而且個子高大又有型，四人正在澳洲一個遊艇會野餐，享用壽司、三文魚刺身、生蠔等美食；見Robin對小雪囝囝Rocco似乎特別疼愛，又攬又錫兼玩騎膊馬，小雪還讓男方輕攬肩膊，態度親密自然，小雪寫道：「Happy Family感恩。」
從相片所見，Robin似乎對小雪的囝囝Rocco特別疼愛，又攬又錫。
小雪在遊艇會被Robin輕攬肩膊，態度親密自然。
今年3月小雪已與第二任陳姓的澳洲籍華人丈夫離婚。資料圖片
「佢真係好靠得住」
小雪有第三個春天，昨日在電話中大方承認，提起男友即冧到爆說：「我哋經朋友介紹認識，穩定交往中。其實我都係第一次有拍拖感覺，以前自己好多一見鍾情，將次序調轉曬，一鍾意就結婚生仔，但今次拍嚇拖先，互相瞭解嚇先。」Robin比小雪年輕數載，但兩人毫無隔膜，Robin與其家人亦接受小雪子女，她說：「Robin媽咪之前買咗好多衫寄嚟澳洲送畀佢哋，真係好感動。今個月尾我仲會帶埋仔女去韓國見佢父母，一齊慶祝元旦。」
令小雪最感動的是Robin為了她捨棄了韓國的工作，她說：「我哋通常用短訊或上網溝通，佢原本喺韓國做新聞從業員，𠵱家決定辭咗份工搬埋嚟澳洲，已經搵到新工。佢真係好好，過去半年努力學英文，又好錫我啲仔女，佢真係好靠得住。」
採訪：小米
from:
http://hk.apple.nextmedia ... 141220/18975014
