李連杰創辦嘅壹基金會喺下星期二（16日）搞慈善拍賣會，舉行地點選咗喺灣仔君悅酒店，向華強因為同傑仔老友，所以中國星會幫手協辦，咁啱呢日撞正係向生66歲生日，但向生就冇意思要大搞慶祝啦，因為十三弟向華勝啱啱過身，佢同呢個細佬好好感情，所以就冇乜心情搞生日，只不過傑仔要佢幫手搞慈善拍賣會，佢就一定要撐到底。
蕭敬騰做表演嘉賓
向太陳嵐會幫手請嘉賓，聽講除咗主人家傑仔出席外，劉德華、古天樂、劉青雲、梁家輝、黃曉明、關之琳、范冰冰、章子怡、張柏芝同陳小春都係受邀請嘅名單，而唯一表演嘉賓係蕭敬騰。中國星發言人李小姐噚日話：「今次蕭敬騰好有善心，零歌酬參加呢次拍賣會表演，因為佢好少嚟香港做呢類慈善拍賣會表演，為答謝佢，我哋決定唔請其他嘉賓表演啦！」當晚仲會有名人捐珍藏品出嚟拍賣籌款環節，向太捐出國際知名的名畫家曾梵志一幅名畫出嚟拍賣，底價200萬，去年曾梵志畫作《最後的晚餐》喺蘇富比拍賣以1.8億港元成交，問向太點解咁捨得攞佢嘅畫出嚟拍賣，向太話：「做善事冇所謂啦！希望賣得越高價越好。」
撰文：馮仁昭
向太捐出嘅曾梵志（右圖）名畫，底價200萬。
資料圖片
馮仁昭
from:
http://hk.apple.nextmedia ... 141210/18963593
