陀B五個月嘅梁詠琪（GiGi）噚日喺尖沙嘴出席宣傳自家設計嘅鞋履活動，幾時都話母愛真係好偉大，好似陀B嗰陣，個肚大到成個籮咁，而且仲好易口腫面腫，有啲仲會搞到皮膚出曬粒粒。好似一直皮光肉滑嘅GiGi，噚日見到佢塊面都生咗唔少粒粒，不過佢都冇投訴仲笑曬口，真係知道乜嘢叫做幸福寫喺面上囉。
GiGi話自己有個長腿B女，唔知到時會唔會長過呢班小朋友呢？
先改老公中文名
喺活動上，見到GiGi著住平底鞋，睇怕又係老公唔俾佢著高踭鞋，佢話：「佢會係咁哦我，見佢咁緊張所以就唔著，同埋𠵱家水腫，舊嗰啲鞋都已經著唔到。」GiGi仲宣佈懷有長腿小公主，佢話：「之前醫生幫佢度過，佢嘅腿長比同週數嘅BB長，係個長腿B。我老公一直恨有B女，所以佢非常開心，仲話覺得女會冧佢多啲！」
講到小公主嘅中文名，GiGi話先要解決技術性問題：「要搵人幫老公改個中文姓先，之後再幫個女改中文名，至於英文名我哋已經諗咗好幾個。」預產期方面，GiGi話喺明年3月，到時會喺香港生B，老爺、奶奶亦會嚟香港。
撰文：馮仁昭
from:
http://hk.apple.nextmedia ... 141107/18926085
