組合BIG FOUR和雷頌德昨日一同出席活動時，齊齊以「男人最痛」來互寸講笑，蘇永康更不時發動攻擊，先笑張衞健前列腺生上頸，後來又寸梁漢文前列腺開叉！
張衞健被問到可有「男人病」時，即扮傻笑指唔知前列腺喺邊。
由張衞健（Dicky）、蘇永康、許志安、梁漢文（Edmond）組成的「BIG FOUR」和雷頌德昨日一同出席有關男士健康的活動，眾人一碰面就忍不住互寸，當雷頌德表示四年前已開始做大腸檢查，並指過程非常舒服時，蘇永康搶先狙擊說：「睇嚟你好享受喎！怪唔之年年都去驗！」
勸老友驗腸
當問到眾人可曾有痔瘡煩惱時，安仔即將問題推向Dicky說：「呢個要張衞健答！」Dicky笑言：「我冇痛過，冇出過血，係咪即係冇試過？其實好幾年前，蘇永康係第一個驗直腸，之後都苦口婆心叫我哋驗，但好遺憾到依家我都仲未去驗。」當Edmond插口表示也未檢驗，安仔又窒兩人說：「再唔去你兩個唔使去！」
蘇永康（左）一直苦勸老友驗直腸，但梁漢文表示還未去驗。
BIG FOUR一同出席有關男士健康的活動，一見面就不停互寸。
被寸生上頸
問到眾人可有「男人病」時，四人又開始大放笑彈，Dicky笑言：「咩係男人病？我連前列腺喺邊都唔知！」蘇永康即指住Dicky說：「喺條頸度。」Edmond攤開手掌插嘴說：「好似喺手掌到！」蘇永康又說：「嘩你條前列腺仲開叉！」Edmond笑言：「咁要搵蘇民峰睇一睇掌！」
文：音樂組
From:
http://orientaldaily.on.c ... /00282_025.html
