為期十天的《第19屆釜山電影節》早前在釜山舉行，不少女星都盛裝打扮赴會，尤其韓國女星Clara、姜藝媛以超deep V谷胸及中門大開亮相，「胸」壓全場！相比之下，選穿圖案露肩裙的內地女星湯唯明顯較為密實，反而獲得時裝作家Janice Wong讚有品味，大受好評。
圖案橫行
圖案在近幾季十分流行，尤其今個秋冬，大多數以60年代圖案為主，例如條紋、橫紋、格子及幾何圖案等。就如湯唯所選穿的圖案露肩裙，以條紋圖案拼湊成，帶懷舊復古風。由於圖案已是裙子的焦點，避忌選太搶顏色，宜選藍、黑、啡色等冷色系列。
湯唯
「好靚，無論條裙嘅圖案、顏色都帶出時尚感，剪裁亦包得身形好fit，加上頸鏈設計特別、搶眼，整體造型唔誇張，展現出湯唯嘅品味。」
姜藝媛（《海雲臺》女星）
「雖然有一塊薄紗，但中門大開設計始終最適合外國人，亞洲人感覺較溫文，佢樣貌太斯文，要wild先襯托得起。加上髮型太casual，行紅氈要端莊啲。」
嚴正花（《觀相》女星）
「黑色晚裝行紅地氈唔太搶眼，但一定唔會輸，係不敗顏色戰衣。佢整體唔差，我鍾意露肩裙呢類型晚裝，但少咗雍容華貴，難艷壓全場。」
金素恩（《怪談少女》女星）
「首先顏色錯咗，全紅色似行緊中式婚禮嘅新娘，與地氈顏色黐地。第二，冇任何珠寶配搭，加上圓領同短袖設計，感覺out of fashion好老土。」
Clara（《急診男女》女星）
「上圍豐滿著deep V，加上大卡數鑽石頸鏈，將焦點放曬喺個胸度，感覺娘味重。而且全白裙太簡潔，似新娘結婚多過行紅地氈。」
李貞賢（《鳴梁》女星）
「圖案同顏色都好靚，感覺舒服，大韓服裝好代表性。但肩膊位好空，晚裝性感係預留位畀珠寶，所以一定要戴條鑽石頸鏈，依家唔夠高貴。」
李荷妮（《千術之神》女星）
「條裙設計幾靚，珠片刺繡好閃耀，魚尾裙襬用薄紗製造，特別有睇頭。不過珠寶較為欠缺，托唔起條裙，頸鏈唔使戴係啱，但應該佩戴大耳環。」
Profile
王麗儀（Janice Wong），時裝作家，是十六年前華語媒體中首位遠赴歐美時裝週報道的時裝編輯。她經常為香港及海外的時裝設計比賽擔任評判，連美國CNN旗下亞洲生活時尚網站及香港Yahoo也分別讚譽她為「香港首位真正的時裝權威」及「時裝文化人」。
from:
http://orientaldaily.on.c ... /00282_065.html
