「一代玉女」楊采妮（Charlie）拍畢英皇電影《一個人的武林》後，於去年尾與拍拖多年的邱韶智在新加坡拉埋天窗，早年傳為愛一度引退娛圈的她，揚言婚後繼續工作拒減產，並自稱曾是個「工作狂」，後來學識平衡工作和生活，閒時多與家人朋友共處，因此無礙跟老公的造人計劃。
為了擴闊眼界多作嘗試，楊采妮當年急流勇退，開創另一幕人生。
最緊要係我哋開心
1997年正值事業高峰期的Charlie，突然急流勇退，與當時男友邱韶智開形象顧問公司，外間盛傳她是為愛情而引退。自去年尾婚後，Charlie也未有接拍新片，不過她卻否認有意減產。
「其實當年我唔係為愛情引退，可能當時我公開咗有男朋友，大家一直印象認為係為愛引退，但我只係想嘗試做其他行業，我亦都冇因此休息，我去咗試做幕後、形象工作。我係一個鍾意做嘢嘅人，只係依家有時做一啲幕後、創作嘅工作，好似寫劇本、寫書，呢啲未必成日出嚟、咁快畀觀眾睇到嘅嘢，我諗跟住落嚟嘅日子，演員我都一路會繼續做，但會畀自己嘗試唔同嘅工作。
楊采妮學懂平衡生活，拚命工作之餘，也會享受人生。
與邱韶智離離合合，楊采妮還是覺得你最好，於去年結婚。
「至於生育計劃，寫作呢啲係可以靜靜地做嘅嘢，所以由去年結婚之後，都有時間同家人相處到。我覺得生育呢樣嘢真係要順其自然，以前我唔會因為見到人結婚而趕住結婚，所以依家都唔會見到人生仔而趕住生仔。雖然我好鍾意小朋友，但我唔覺得係非要不可，如果有係上天畀嘅禮物，會覺得好開心，但如果係冇的話，我覺得婚姻係有個先生、老婆一齊已經係一個家庭，雙方父母都覺得最緊要係我哋開心，所以都冇催我哋。」
王寶強於戲中殺氣騰騰，與楊采妮只是你追我逐，鮮有交流。
楊采妮去年作出新嘗試，初次執導電影《聖誕玫瑰》。
同王寶強冇偈傾
去年，Charlie接拍英皇電影_《一個人的武林》挑戰剛強差婆角色，與「宇宙最強」甄子丹聯手追捕飾演連環殺手的內地演員王寶強。
「戲裡面我係個壓力好大嘅Madam，性格上同現實嘅我好唔同，成套戲佢都冇笑過，好大壓力之餘，佢嘅人生都只得工作，破唔到案會好緊張，因為關乎人嘅性命，亦都會歸咎自己。今次唔多打鬥戲份，我都係追逐、揸槍多，相信電腦、高科技可以解決問題，子丹、寶強就同我正正相反，覺得功夫係傳落嚟，要尊師重道、練習磨合。
「最有趣係我同寶強一句對白都冇，每場戲見到寶強都係揸住支槍追殺佢，我哋冇兩個坐低對話嘅文戲，只係用唔同方法去追殺佢，包括快艇、車、電單車……拍完套戲我就同佢講：『真係唔好意思，好似好冇禮貌咁』，有時見到招呼都未打，一嚟就用槍指住佢，佢都覺得好好笑，希望有機會再同佢合作時，大家可以有多啲對話，最好係拍喜劇輕鬆啲。」
去到盡頭就要放手
1991年出道的Charlie拍過電影、出過唱片及寫過書，2012年她更一圓導演夢，首執導筒拍攝電影《聖誕玫瑰》。步伐從未停下來的Charlie，自言曾經是個工作狂，後來才學懂平衡生活、享受人生。
「以前覺得畀心機工作先叫做努力同盡責嘅人，曾經諗過與其有休息、娛樂，不如再畀心機做多啲嘢。當時都會覺得大壓力，但坐低慢慢思考清楚就會發現，其實呢種壓力係自己畀自己，好多嘢係自己可以選擇，盡咗力到咗某個程度已經足夠，唔需要將自己逼到好辛苦。
「後來又覺得工作同生活要平衡，跟住我就慢慢調節，工作時工作、遊戲時遊戲，當自己畀心機工作，有投入將工作做好時，其實都應該畀時間自己休息、放假，同朋友、家人相處，當生活各方面嘅嘢都平衡時，你會覺得好豐富，而且冇咁易嬲同執著，呢個係我平時追求嘅生活模式。
「成長過程令我想法有變，我一路想令自己生活愉快、平靜，所以成日會搵壓力大嘅因由係乜嘢，係咪有啲乜嘢令你覺得唔和諧，你就要問自己嗰樣嘢可唔可以處理、面對，唔可以就冇辦法，冇辦法改變嘅嘢就要放手，我會嘗試改變，與其坐喺到覺得自己壓力好大，倒不如睇下點improve自己生活。
「做導演一樣，要搵到中間條界線，我會盡力而為唔會勉強，當覺得有啲嘢可以更加好，我就要將佢做到更加好，但有啲嘢知道冇辦法改變，去到盡頭就要放手，如果唔係就會令大家好辛苦。」
噓寒問暖
九十年代風靡萬千少男的Charlie，如今歷盡風雨在娛圈有一定地位，但她卻一如既往毫無架子，對身邊所有人也關懷備至，受訪當日見房內冷得讓人發抖，Charlie即著助手拎出私家圍巾，體貼地借給工作人員保暖。如此低調、親民、尊重人的大明星，絕對是一眾後輩學習的對象，讓小記也感到十分意外。
文：黎寶倫
攝：嚴偉國
髮型：Sam Lo @ pi4.com.hk
化妝：Ling Chan @ the ZING makeup school
服裝：Escada
場地：Faces Music Lounge
From:
http://orientaldaily.on.c ... /00282_055.html
