章子怡同汪峰嘅擬結婚通知書噚日期限屆滿，但仍然未現身註冊。資料圖片
汪峰早前向章子怡求婚成功，仲喺3月29日嚟咗香港排期註冊，條例訂明擬結婚通知書發出之後，要喺3個月內簽紙註冊，計番日子噚日已經係期限最後一日，如果佢哋冇去簽字，份通知書會作廢。
子怡同汪峰拖住手（黃圈示）食海鮮。
《騰訊娛樂》圖片
擬結婚通知書
汪峰大前晚喺內地開騷，預早切蛋糕慶祝。
有心製造驚喜
內地傳媒都好緊張佢哋嘅婚事，網易就聲稱聯絡到汪峰方面，對方仲話汪峰本人想畀大家一個驚喜，所以暫時未公開婚訊。講到咁好似暗示已經同子怡結咗婚喎！大家仲估汪峰可能會喺最後一場巡唱再做大龍鳳公開結婚證。汪峰噚日44歲生日，大前日就喺西安嘅陝西體育館舉行巡迴演唱會，順便切蛋糕慶祝，台下觀眾不停大叫章子怡嘅名，台上嘅汪峰就對歌迷話：「章子怡在我上台前對我說，如果現場有人喊她名字，要我謝謝大家。」
早幾晚就有內地傳媒影到佢兩個戴住情侶cap帽襯白色便服，約埋一班朋友去食海鮮。晚飯之後子怡同班朋友喺門口握晒手，有人又提議返大堂影合照，子怡仲即刻叫已經上咗車嘅汪峰，不過佢只係落一落車點吓頭，就冇進一步行動。子怡滿足咗朋友要求之後，就上車同汪峰一齊離開。
撰文：馮仁昭
馮仁昭
from:
http://hk.apple.nextmedia ... 150630/19202380
