入行以嚟都係baby face嘅賈思樂，原來後日就係60大壽，前晚佢過百位圈中好友專登飛去泰國曼谷同佢舉行咗個大型生日party，包括杜麗莎、王馨平、余慕蓮、陳法蓉、廖安麗、馮寶寶、黎瑞恩、陳敏兒、盧敏儀同林漪娸等等，可見得賈思樂人緣真係相當好。
陳敏兒、吳麗珠同余慕蓮亦悉心打扮為賈思樂賀壽。微博圖片
華仔嘟嘟短片祝賀
噚日馮仁昭打畀賈思樂，佢好開心話：「佢哋好賞面，全部自費，有成130人，全世界啲好朋友都嚟曬同我慶祝大壽。當初我唔想搞，但好朋友話呢個生日係代表男人一個階段，一定要慶祝。雖然係攰，但值得嘅，玩到凌晨一點都未散，大家飲酒傾偈，好開心有呢班朋友支持我。」前晚廖安麗、馮寶寶同戚美珍等輪流講賈思樂過往啲儍事，班老友仲送咗個驚喜video畀壽星公㖭。賈思樂話：「個video係所有去唔到嘅演藝界朋友祝賀我，令到我好感動，包括劉德華、毛舜筠、鄭裕玲、盧海鵬、羅蘭，好多數唔曬，好nice，搞到我幾乎喊。」賈思樂係唱家班，當然唔少得同杜麗莎、黎瑞恩以及王馨平等一齊jam歌啦！
撰文：馮仁昭
From:
http://hk.apple.nextmedia ... 140929/18882710
