「入得廚房，出得廳堂」，對名模Ana R.來說可謂當之無愧。Ana於去年12月嫁作人妻，每次提起老公Bradley Garland，她都展露出甜蜜的笑容，告訴大家她很幸福。他們的夫妻之道除了坦誠溝通外，廚藝了得的Ana，在老公心中當然加了不少分，而她亦將這優點發揚光大，放於事業上與眾分享，將推出網上視頻教廚藝。
煮得一手好菜的Ana R.，名副其實「入得廚房，出得廳堂」。
夫妻之道對Ana R.來說最重要的是溝通，老公Bradley因為工作關係，兩人見面的機會不多，但並沒有因而影響感情，反而更珍惜見面的每一分每一秒，生活上的瑣碎事，均是美好的。Ana婚後每當提起老公，從她口中總是一個「忙」，她說：「老公工作好忙，成日唔喺香港，我哋好少見到面，但我哋有一個好好溝通方法，就係臨瞓前會傾偈半個鐘，無論任何事都會傾，我覺得咁樣好窩心、好sweet，我好享受呢個時刻。另外，星期日一定係屬於我哋嘅二人世界，兩人喺一齊雖然冇乜特別嘅節目，多數留喺屋企休息，可能會睇吓戲，散吓步，煮飯仔，但只要大家陪在身旁已經好滿足。老公好鍾意我煮嘅嘢，所以下廚亦成為我哋嘅樂趣之一，可能因為咁，婚後佢肥咗廿幾磅，肥咗一個碼，連佢自己都接受唔到，話要減肥。」
煮得一手好菜的Ana，為了配合老公減肥，透露特別鑽研了不少健康美食。至於會否一齊做運動減肥，大家互相鼓勵對方？Ana說：「佢唔肯同我一齊做Gym，因為我無論任何事，都笑餐飽，我做Gym時成日無端端為小小事就大笑，佢覺得我騷擾佢，好影響佢減肥進度，佢為咗減肥好有毅力，依家已有成果，減番唔少。」
Ana R.
Ana熱愛模特兒工作，但亦積極為未來鋪路。
母祝壽延生B
雖然享受二人世界，但見到身旁好友的小孩可愛趣致，也令Ana想擁有自己的小朋友，但因為媽媽的大壽令她造人計劃要延期進行，她說：「身在韓國的媽媽今年年尾六十大壽，家人將為佢舉行大型派對，到時所有嘅親戚都會出席，老公亦係首次見齊咁多人，為咗呢個派對，我哋用咗好多心機搞，所以唔想大住肚去，驚辛苦又玩得唔盡興，等呢件大事完成咗之後，我就專心生小朋友。」
Ana與老公Bradley恩愛甜蜜蜜。
Ana以美食饗老公，令他婚後肥了廿多磅。
Ana閒時會帶老公見識香港風貌。
教三分鐘廚藝
除了幸福婚姻，Ana亦擁有不錯的事業，但她深明模特兒工作有年齡限制，雖然現階段不會放棄，但亦開始為未來鋪路，她說：「若果有小朋友，我會主力放喺家庭及照顧小朋友，起碼生完BB嘅頭兩年一定會全心全意照顧BB。但我太愛模特兒工作，所以冇諗過退出，就算將來唔行騷，亦希望做有關模特兒嘅工作，例如做導師，培訓新一輩嘅模特兒。」
另外，善於廚藝的Ana，亦希望可以將廚藝與大眾分享，已籌備在網上教人下廚：「本來想出cook book，但我唔識中文，喺香港出cook book有啲難度，所以想拍video網上教人煮餸，我依家諗緊點做先係最好，因為煮一個餸要花好多時間，啲人睇晒成個過程會覺得好悶，我希望將段片剪到得三分鐘，要剪到教曉人哋煮到一個好餸，但暫時最少要剪八分鐘，驚人哋睇到會好悶，所以仲努力緊。」Ana又謂自創了廿多款食譜，全都是以健康為大前提，十分適合現在着重健康的都巿人。
獨愛圓形首飾
哪個女人不愛珠寶首飾？Ana R.亦不例外，她表示對圓形的首飾情有獨鍾，覺得圓形線條好滑溜：「由細到大都鍾意圓形，覺得圓形好高貴、好性感、好似女性嘅身材，好有吸引力，我好希望將來可以設計自己心中所喜歡嘅珠寶。」Ana還透露現亦與朋友的珠寶店合作，做買賣工作，待對珠寶生意更有深入了解時，就會參與設計工作。
採訪：Jessica Lam
攝影：張福宏
服裝：YEECHOO.com
化妝及髮型：Carrie Mok
場地：Ambrosia Oyster Bar & Grill
鳴謝：Just Gold
From:
http://orientaldaily.on.c ... /00282_085.html
