舒淇食回頭草女人果然係善變嘅動物。好似舒淇咁，之前同張震合作《最好的時光》嘅時候，佢就話同對方好有默契，仲投入角色抽唔到身。估唔到事隔幾個月，佢再同張震合作《天堂口》，竟然話覺得悶。
原來舒淇真係悶到要食回頭草。且慢驚喜，唔係黎明，而係前緋聞男友、台灣電影剪接師李先生。上月22日，下午5點零鐘，佢就約咗李先生響四季酒店見面。開頭只得佢兩個響coffee shop 坐埋角落嘆茶。之後舒淇唔知係咪發現有記者，打咗個電話，十零分鐘後，完全冇化妝嘅好姊妹林熙蕾趕到，屁股都未坐暖，就一齊搭𨋢上房。
其實01年嘅時候，舒淇同李先生嘅緋聞都傳得好厲害。當時有傳舒淇同黎明分手，佢就同李先生經常出雙入對，又俾《忽周》獨家影到齊齊溫馨行超市。之後又俾傳媒影到兩人手蹺手撐枱腳把酒談心，感情發展得相當唔錯。可惜後尾佢同黎明翻撻，先至同李先生嘅感情不了了之。
舒淇早排接受訪問時話過，近排完全冇工作意慾，唔知同李先生再次行埋有冇關呢？
01年，舒淇已被《忽周》發現同李先生響金鐘太古廣場嘅「Great 」甜蜜買餸返屋企煮飯仔。
舒淇（右）急call ，好姊妹林熙蕾（中）冇化妝都仆到嚟，仲刻意攝響舒淇同緋聞男友李先生（左）中間，真係辛苦晒。
