無線近年鬧小生荒，以外援身份幫無線拍劇的黃浩然近年被完全「榨乾」，一年拍足五套劇，最終捱出怪病來。早前他證實患上罕見的「貝塞特氏症」，住院兩星期，昨日黃浩然終於出院，有傳此病會令生殖器官潰爛，他笑言不會和老婆造人來證明性能力，並說：「我嘅生殖器官，大家都唔使擔心。」
剛踏入39歲的黃浩然，05年與形象指導莫家嘉結婚，並育有兩子，他為養活妻兒，自07年開始幫無線拍劇，由二、三線角色做起；至近年無線人才流失情況嚴重，小生買少見少，令即使不是「親生仔」的黃浩然亦被器重，近年幾乎每年要拍五部劇。不過在大台拍劇出名要好捱得，不時要連續開工24小時亦司空見慣，早前黃浩然又幫無線與田蕊妮飛澳洲做「2014翡翠互動嘉年華」嘉賓，當時他喉嚨已出現不適，受訪時不停咳嗽，狀甚辛苦。
【用紙巾抹汗】
黃浩然身體仍虛弱，仍需停工休養。
【清一清喉嚨】
黃浩然指患病期間曾喉嚨潰瘍惡化，但昨日聲音響亮，精神尚算OK。
養病停工損失百萬
昨午2時許，黃浩然在經理人陪同下離開九龍法國醫院，明顯瘦了一圈兼面部浮腫，但精神尚算不錯，並回覆響亮聲線。身高六呎的黃浩然表示病發時體重跌至136磅，現已回升至140幾磅。他透露上月已經發病，當時以為是扁桃腺發炎，直至本月4日才入院，皆因之前要去澳洲登台，他說：「最初懷疑自己嘅作息及進食唔定時，之前嚴重到講唔到嘢，我喺上月26日開始發病，但28日至今個月2日又要去澳洲做騷，喺澳洲嗰陣全程我都講唔夠10句，好辛苦，最嚴重口水都吞唔到。」返港後，黃浩然即往求醫，一度要入住隔離病房，他續說：「其實入院第二日用藥已見效，但喉嚨潰瘍惡化，口腔有白色嘢。」
原本黃浩然在新劇《張保仔》中飾演張保仔一角，但因怪病被迫辭演：「好可惜，但始終身體緊要，不過就錯失好機會。」據知該劇酬勞連取消的出埠登台，保守估計黃浩然損失逾百萬，加上入住私家醫院又花近四十萬元醫療費，認真損失慘重。
【被傳媒包圍】
身高六呎的黃浩然，體重曾急跌至136磅，昨日出院時接受傳媒訪問。
黃浩然獲《張保仔》劇組送上巨型簽名慰問卡。
為養妻活兒，黃浩然一劇接一劇，終於捱出怪病來。資料圖片
感激太太貼身照顧
有指「貝塞特氏症」除令患者有機會致失明外，亦可能「下延」致生殖器官潰爛，黃浩然昨笑笑口說：「大家都好關心呢樣嘢，其實身體任何一條血管都有機會發炎，幸好心臟血管冇發炎，我嘅生殖器官大家都唔使擔心。」問是否已經完全康復？他說：「醫生話所有指數都Check曬，因為呢個病除咗令微絲血管發炎，嚴重嘅可能心臟血管都會發炎，但心肝脾肺腎都Check曬喇，冇問題！當然𠵱家身體係會弱啲，我都瘦咗十幾磅。醫生話適量運動，湊仔返學放學、行下山都OK。」
事後，黃浩然接受電話訪問時，被問到會否生多個力證性能力？他想了想說：「唔會喇，𠵱家要養兩個化骨龍已經好甘，之前都係因為怕大仔寂寞先生第二個，再生第三個機會唔大。」他感激太太在患病期間的照顧，以及經理人公司老闆向華強太太陳嵐傳短訊予以關心。
採訪：張俊銘
攝影：陳志嵐
From:
http://hk.apple.nextmedia ... 140919/18870868
