周董噚日冇戴戒指出席活動，佢話係因為造型師冇提供就唔戴。
昆凌
周杰倫（周董）噚日喺上海出席「2014觀瀾湖世界明星賽記者會」，大會特別訂咗支好似雙節棍嘅高爾夫球杆送畀佢，周董收到禮物好開心，但就自認高爾夫球技術麻麻。
周董日前喺北京出席記者會，突然喺左手無名指戴咗隻戒指，不過噚日佢又「兩手空空」乜都冇，馮仁昭問周董點解又將戒指除咗，怕fans呷醋定同女友昆凌感情有變？周董笑住反問記者：「哪一天（戴戒指）？」之後就話嗰日係造型師叫佢戴，噚日造型師無畀佢戴所以就無。問佢下年1月又要結婚又要出碟，會唔會好忙，周董就笑住話：「我說36歲前，明年1月18日之前會做一件有意義的事，若果是成家立室也不錯，現在專輯為先，婚禮不能一拖再拖，所以專輯要快點完成。」
伊能靜明年嫁細佢10年嘅內地藝人秦昊，但堅決否認用肚逼婚。微博圖片
伊能靜微博闢謠
另外，現年45歲嘅伊能靜今個月初自爆男友、內地藝人秦昊已經喺7月求婚，之後有傳佢係以肚逼婚。決定下年2月結婚嘅伊能靜，噚日喺微博澄清：「我覺得這樣對秦先生很不公平，其實他認識我的時候，他就已經跟我提過（結婚）。」又話決定嫁畀秦昊，一半嘅理由係因為佢爸爸媽媽對自己好好。
雖然伊能靜否認以肚逼婚，但有占卜結果話佢今年12月會懷孕，仲話好大機會生女。台灣傳媒想搵伊能靜前夫庾澄慶（哈林）回應，哈林經理人就代答話唔回答。
撰文：馮仁昭
From:
http://hk.apple.nextmedia ... 140915/18866288
