[資訊分享] iPhone 6炒機攻略，機都未出回收價9900元

當今世上，相信除咗蘋果外，真係冇咩邊間手機公司，係會令粉絲「未出機，先興奮」達至瘋狂地步！距發佈會仲有5日（9月9日），離部機正式上架仲有大大話成15日（9月19日），但已經有人喺紐約Fifth Avenue蘋果旗艦店排緊隊。

你以為外國人瘋狂啫，但香港炒家亦已進入作戰狀態！iPhone6未面世，但先達已有iPhone6回收價，每部大拿拿9900蚊！千頌C咁大個女，都見過有產品未推出，連規格都未有，個樣係點、行貨賣幾錢都唔知情況下，就已經有回收價。

千頌C昨日搵過先達G World Mobile劉志剛（提外話，呢位劉生由於經常接受傳媒訪問，幾乎成為先達發言人），佢就話，「9900蚊都係亂噏，連賣幾錢都未知，點會有價。」但佢估計「開市」頭幾日，回收價都有Double。

咁作為iPhone小散戶/小炒家，於發佈會前，又有咩要準備呢？千頌C已經為各位，向各路人馬收集意見！

1：想沽機要快
於發佈會前，各代iPhone回收價都未見太大震盪。不過！劉志剛話，發佈會後，一般會全線減800蚊！所以有賣趁手。

2：盡快開信用卡
各位準炒家，記住蘋果會限定每張信用卡可以買幾多部，所以要炒得多，事前要準備多張信用卡。係好煩架，但唔辛苦邊得世間財。一般由申請到開卡，2個星期咩都夠，所以依家出定啱啱好。

3：申請多個Apple Online store帳戶
每逢開賣，網上都會牽起混戰，到時秒秒鐘都係錢。唔想因為填order form浪費時間？一早用唔同信用卡，去Apple Online Store開唔同Account。到開賣時，極速落Order。

注意嘅係，即使你用唔同信用卡number訂機，但如果係用同一個住址，去買好多部機，都好易被Cut單。所以最好用公司地址登記，前提係，你老闆唔介意。

4：留意各大電訊商推廣
數碼通最近再推RED Pass免費留位服務，呢啲服務又唔使錢，登記定冇壞。又或者以前電訊商試過，於開賣首日零晨12點搞搶機Party。據經驗，如果你叻仔買到的話，當晚即時向街邊水貨佬沽機，個價係最最最靚的。

5：雖然未知新iPhone任何規格，據經驗，最易炒一定係容量最細嘅白色機，如果冇，就買容量最大嗰部，買中間容量最冇So。不過依家講唔埋，都係等公佈先有得估。

如果閣下有更多更妙嘅炒機攻略，歡迎留言。

by千頌C@堆填區
http://fb.com/winbigwok
From:http://hk.apple.nextmedia ... 140905/18855889

「果迷」引頸以待的iPhone 6，預計最快於美國時間下周二亮相，業內估計最快本月19日開售。除一眾電訊商各自提供預留新機服務外，旺角先達廣場、深水埗手機店亦提供預訂，以9,200元可預訂4.7吋32GB iPhone 6，料炒價可破萬元。

本港電訊商近日大打搶客戰，數碼通推出「RED Pass」通行證，讓客戶提早輪候iPhone 6和Samsung Note 4，csl.亦推出擬定的iPhone 6月費計劃。內地電訊商戰況同樣激烈，中移動北京官網早前提供iPhone 6預約，預約人數突破3.5萬人，有傳聯通亦刊登預約海報，4.7吋16GB售5,288元人民幣，即約6,662港元；而5.5吋64G售價則達7,688元人民幣，即約9,692港元。

屬4.7吋32GB無鎖版本

若不想被長約困身，旺角先達廣場、深水埗手機店亦提供iPhone 6預訂。先達的港一科技有限公司，提供4.7吋32GB無鎖版，可以9,200元預訂，與內地所傳的32GB售價6,088人民幣（約7,670港元）開價高近兩成。

港一科技有限公司職員盧銘豐表示，公司已安排人手由美國帶貨來港，估計可取得50至100部iPhone 6，相信能於19日同步銷售，已超過30人預訂。由於無法證實5.5吋iPhone 6是否於同日開售，他表示，現階段只接受4.7吋預訂，估計5.5吋叫價可達1.1萬元。

中港同步售無礙炒風

網上有傳一張先達廣場iPhone 6收機價為9,900元的相片，先達手機店G-World Mobile負責人劉志剛亦表示，現時炒價已過萬元，相信此價位可於開售後維持一至兩星期。面對中港同步開售，他認為內地需求龐大，對本港的銷情影響不大。

果迷紐約紮營勢破排隊紀錄

蘋果將於下周二發布iPhone 6，有果迷上周日起已於紐約第五大道的旗艦店外紮營排隊等買機，預計他們要排隊19天，勢打破以往買新iPhone的18日排隊紀錄。

四名果迷帶備帳篷、沙灘椅等「裝備」在店外長期作戰，期望開售當天即獲得iPhone 6。排頭位的女士表示，由於她要宣傳一個應用程式，因此上周日起已來到。另外一位男子與表弟稱，希望打破排隊18天買新iPhone的紀錄。