香港人被自由行逼到無曬空間，周街都係化妝品店同藥房之後，而家仲進佔埋泳池、燒烤場。喺未有解決辦法之前，出走似乎是唯一的出路。不過，當所有香港人都係咁諗，問題就出現了。不約而同想逃離香港，最熱門梗係日本，就當唔去東京改去大阪，一到埗聽到廣東話仲多過日文，見到嘅牌子香港都有，旅行？幸好大阪仲有地方未被攻陷，南面嘅心齋橋、難波去到熟曬路，何不向大阪北部出發？地鐵沿線幾個小區中崎町、茶屋町及天神橋筋商店街，有不同主題的特色小店及cafe，一邊閒逛一邊找心頭好，放鬆心情再回港打拚。這才是出走的意義。
天神橋筋商店街去大阪，與其行大商場，不如去商店街感受嚇地道的人情味。大阪嘅天神橋筋商店街係全日本最長，約2.6公里有600間店舖，有過百年歷史的老鋪，亦有充滿特色的小店。香港人到訪，通常都是去附近的天滿宮參拜，或是食盡商店街的美食，其實只要行多兩步，轉入小巷，就會發現驚喜處處。
貓頭鷹café 零距離接觸於商店街起點的一丁目，有一家貓頭鷹café。於裡面招呼客人的，是一隻隻活生生的貓頭鷹。Café飼養的貓頭鷹共有20多隻，品種大小各有不同，由身長15釐米到超過50釐米，顧客只需用76元點1杯飲品，就可以在一小時內與貓頭鷹自由接觸。平時看貓頭鷹，通常都是隔著玻璃，係今次可以零距離接觸，對生活於石屎森林的香港人來說，實在是機會難得。店員先講解與貓頭鷹相處時的注意事項，雙手消毒後就可以親親貓頭鷹。每隻貓頭鷹腳下都有繩綁住，在店員的協助下，可以將貓頭鷹放在手上或在膊頭上拍照，甚至可以摸貓頭鷹的頭，貓頭鷹眼大大的可愛表情，迅即俘虜現場女顧客的心，不停用相機及手機影個不停。影完相之後，可以選購貓頭鷹精品，有些更加係café獨有，貓頭鷹fans絕對不能錯過。Café於大阪開業差不多一年，由於不接受電話預約，每逢週末門口都出現一大條人龍，建議平日下午人較少去碰碰運氣。
Café入面有20多隻唔同種類嘅貓頭鷹，每次有5至6隻同客人玩，其他就休息，保證唔會令貓頭鷹過分操勞，可以保持精靈樣。
店員話如果想摸貓頭鷹，千祈唔可以摸腹部及翅膀，同時要用手背摸，咁佢就會乖乖企定喺手指上合照。
可以要求貓頭鷹企喺手指或膊頭上，有時貓頭鷹會拍翼，嚇到女孩子大叫。
Café每小時會招呼15位客人，其實大家都唔係志在飲品，所以café都只係提供簡單的咖啡、可樂及果汁。
Café內的精品區全都是貓頭鷹產品，簡單如頸鏈都有好幾款，鍾意貓頭鷹公仔嘅女孩子請準備好現金掃貨。
貓頭鷹之店
地址：大阪市北區天神橋1-10-13營業時間：12nn-8pm（星期二至五）、11am-8pm（星期六、日及公眾假期）、逢星期一休息網址：
http://blog.livedoor.jp/owlfamily
交通：地下鐵南森町站或JR大阪天滿宮站步行7分鐘
鳥痴搬樹入鋪 開café於香港人眼中，商店街的形象都是充滿舊日本色彩，亦即係老土。其實近年有好多小店進駐入傳統老街。位於一丁目的駒鳥姊妹店，斜對面就是天滿宮，店主本身於附近有一間二手書店，半年前有朋友問佢有無興趣搞café，於是就將自己最喜歡的雀鳥作為café的主題。一行入店內就見到一大棵樹種在店內，細心一看才發現其實是折枝，原來店主好嚮往可以坐在樹下睇書，不過開一間戶外café又有難度，於是靈機一觸，索性搬棵樹入鋪。店主對於咖啡很講究，用上開業近百年的神戶老店的咖啡豆，用傳統意式的拉壓式沖泡，於日本比較少見。配上一個個小鳥形狀的donut，每天由附近的工場烘製再送到café，保證新鮮。店內有一個大書櫃，全部放滿有關雀鳥的書及雜貨，由圖鑑到小說，模型到飾品，店主為各位雀鳥愛好者四出蒐羅，仲話好歡迎來自世界各地嘅同好去café同佢一齊分享睇雀嘅樂趣。
呢棵折枝係店主同朋友上山搵返嚟，然後逐塊逐塊將人造樹葉貼上去，足足整咗兩個月。
形狀好可愛嘅小鳥donut（$14），有原味、朱古力、肉桂等味道，麵包鬆軟，甜味適中，一個人起碼食三粒。
雀仔形狀嘅精品市面上見唔少，豉油樽真係少見，仲要賣成$820至$2,052不等，買咗都唔捨得用。
店主土井先生平日在café看鋪，週末就會返二手書店，原來佢仲兼職喺大阪做DJ講電影，失覺曬！
駒鳥姊妹店
地址：大阪市北區天神橋1-14-11天神大廈101號室電話：+81-6-6360-9616營業時間：11am-7pm逢星期一休息網址：
http://komadori-shimaiten.jp/
交通：地下鐵南森町站或JR大阪天滿宮站步行5分鐘
茶屋町好多香港人都識去梅田行街shopping，不過行過少少嘅茶屋町就唔係咁多人認識。茶屋町近年於大阪被打造成為潮人聖地，好多潮店進駐，好似喺東京原宿排曬長龍嘅雜貨店ASOKO，就選址喺茶屋町開旗艦店，加上附近的潮店，以及特色café及餐廳，好多大阪的年輕人都改蒲茶屋町。
Asahi主題酒吧 飲凍啤好多香港人都喜歡飲日本啤酒，Asahi係其中一個最受歡迎嘅牌子。最近Asahi喺全國十個地方開設酒吧Extra Cold Bar，專賣Super Dry系列啤酒，酒吧係夏天期間限定，等大家可以過一個涼浸浸嘅夏天。大阪呢間分店，門口已經有一大杯啤酒嘅招牌，包唔會去錯。入到去，原來裡面只設企位，最適合上班一族放咗工輕鬆飲一杯。叫得做Extra Cold Bar，對啤酒的溫度十分講究，維持喺-2℃，加上雪到凍的特製不銹鋼啤酒杯，飲每一啖啤酒都透心涼，呢度更可以俾顧客試嚇自己斟酒！日本人飲啤酒最講究係佐酒小食，Extra Cold Bar嘅小食甚有水準，黑啤煮豬腩肉、海膽汁燒大蝦等等，唔似一般居酒屋，食來食去都係炸雞軟骨同串燒，在場所見好多女仔都嚟幫襯，唔怕同大叔逼！
平時喺居酒屋飲到嘅Super Dry Beer係中間嗰杯（$43），Extra Cold Bar有埋黑啤飲，呢杯係青檸味黑啤（$43），不過飲落無乜水果味。
起初以為Extra Cold Bar係要著羽絨先入得嗰啲冰窖吧，其實凍係指啤酒，不過酒吧的裝修帶出cyber feel，望落真係凍啲。
親自體驗斟啤酒，原來很講究，要用角度及力度去控制泡的份量，店員哥哥話唔係人人有天分斟得好。
海鮮刺身牛油果冷盤（$65），三文魚、三文魚籽、甜蝦配上白醋汁及牛油果，非常醒胃，最啱當頭盤。
炸豬塊（$34），又係驚喜之作，望落以為炸雞，一咬肉汁便湧出來，Juicy到不行，美中不足係伴碟雞蛋熟過頭。
黑啤煮豬腩肉（$30），起初見到賣相不太吸引，點知食落有驚喜，啤酒味濃而不苦，原來加了番茄及紅酒吊味，好食！
Extra Cold Bar大阪
地址：大阪市北區芝田2-3-7電話：+81-120-223-374營業日期：至9月30日營業時間：11:30am-11pm（星期一至六）、11:30am-10pm（星期日及公眾假期）網址：
http://www.asahibeer.co.jp/superdry/extracold_bar/
交通：地下鐵梅田站或JR大阪站步行7分鐘
日本最潮 Pancake Popcorn合體近兩年日本最興兩個P，一個係pancake班戟，一個係popcorn爆谷，呢兩種食物嘅專門店開到成行成市，櫻花妹全部趨之若鶩，排幾個鐘都要食。喺茶屋町新開嘅CaféHoliday睇準商機，一間鋪賣曬班戟同爆谷，的確有諗頭。佔地兩層嘅CaféHoliday，以夏威夷海邊之家為設計藍本，店裡有水槽、滑板等等做裝飾，充滿夏日氣息。店內主要賣甜品，芭菲及班戟好大份，一個女仔好難食得曬，見到隔籬枱嘅兩個日本妹妹叫一份share，再慢慢傾訴感情事，坐足一個下晝。店外就係賣爆谷，有11款爆谷每日即製，有鹹有甜，仲可以先試食揀啱先買，選擇困難症嘅我幾乎想每一款都買！
店內裝修以夏威夷風為主題，無論係白色橡木的座位，或是模仿海邊酒吧的吧枱，都甚有異國風情。
Triple Berry Pancake（$108），侍應放在我面前時不禁嘩一聲，咁大份點食呀？幸好生果新鮮，班戟及上面的忌廉不算太甜，最後食咗四分三，夜晚已經唔使食飯。
Tropical Fruit Popcorn Parfait（$66），非常足料，生果雪糕各一層，最底沾滿雪糕的爆谷最好食。
香港人睇戲先食嘅爆谷，近年於日本非常流行，呢度有11款爆谷，分大中細袋，每款味道唔同價錢，由$30至$105不等。
CaféHoliday
地址：大阪府大阪市北區茶屋町4-6竹村大廈一樓電話：+81-6-6377-6686營業時間：11:30am-10:30pm（星期日至四）、11:30am-12mn（星期五、六及公眾假期前夕）網址：
http://www.cafeholiday.jp
交通：地下鐵梅田站或JR大阪站步行5分鐘
中崎町去日本嘅朋友，好多都喜歡逛小店，貪小店嘅精品獨一無二，唔會同人撞。去東京，好多人都識去惠比壽、代官山，去大阪，識去就要去中崎町。中崎町蒐集幾十間藝術小店，有好多都係由當地年輕藝術家創業而成，每一間都有自己特色，而且中崎町保存著昭和時代風貌的舊建築，現在被打造成大阪文化之區，係活化的成功例子。一邊穿梭窄巷散步，一邊逛小店café，非常寫意。
自家設計 長頸鹿遊美屋門口有一隻大大的長頸鹿，一望就知道係販賣有關長頸鹿嘅精品。入到去，才發現點只精品咁簡單。店內所有產品固然是清一色長頸鹿，除咗一般會有嘅明信片、手機繩之外，就連一啲比較少有嘅種類都有，好似店主親手造的耳環及頸鏈吊墜，以及自家設計的杯碟碗筷，保證出面買唔到。店主歸山先生本身係一個白領，4年前毅然放棄穩定職業走去創業，因為自己鍾意長頸鹿，於是就開一間專賣店。除咗賣精品之外，歸山先生不時同畫家合作，喺遊美屋一角搞畫展，畫風各有不同嘅畫家，只要係畫長頸鹿，都可以將畫放喺店內展賣。歸山先生話希望略盡綿力去幫新進藝術家，香港嘅朋友都無任歡迎㗎！
遊美屋會不定期有畫家展出作品，如果睇啱心水仲可以買走。
店主話自己畫畫唔算靚，只係熟能生巧，對得多就淨係識得畫長頸鹿。
長頸鹿餐具由店主親自設計，本來俾自己小朋友用，後來先大量生產，最安心係Made in Japan呀。（大叉及匙：$23、小叉及匙：$12、杯：$49）
除咗一般精品，仲有著得上身嘅原創設計鞋，每一對都係由店主自家製，世上得一對，對愛好者嚟講唔算貴。（布鞋：$304、皮鞋：$2,508）
遊美屋
地址：大阪市北區中崎3-2-18電話：+81-90-8211-7929營業時間：12nn-7pm（逢星期二休息）網址：
http://asobiyaweb.nomaki.jp
交通：地下鐵中崎町站步行8分鐘
可愛塔形蛋糕 自拍首選茶屋町有好多café，每一間都各有特色，表表者係有四間分店的太陽之塔。位於中崎町的分店叫ULTRA JAM，專賣蛋糕，以懷舊為主題，店內的枱櫈擺設，都充滿昭和年代田園氣息。太陽之塔賣嘅蛋糕，每一款都好似一座塔，雖然無一款真係大阪萬博公園入面個太陽之塔，不過每一款蛋糕有唔同造型，女孩子見到第一句一定係Kawaii，再拎出手機拍個不停。太陽之塔嘅蛋糕全部於店內廚房焗製，上面用mousse塑造成可愛樣，搭配底層的酥皮蛋糕，甜而不膩，又好睇又好食！留意每款都有限量，每日賣曬就無！
一入門口就見到一個個塔形蛋糕色彩繽紛，一般每日都會有15至20款，節日期間好似聖誕、新年仲會有特別款式。
店內裝修走復古路線，放曲奇餅的木櫃，地上的四方階磚，恍如時光倒流。
太陽之塔咖啡（$60），即係latte，總是覺得日本嘅忌廉特別香滑，怕肥都唔好嗌走cream呀。
Strawberry Tart（$40），個人認為最似塔的蛋糕，餅底非常鬆脆，牛油味香濃，食唔曬上面啲忌廉都可以食曬個餅底。
太陽之塔ULTRA JAM
地址：大阪市北區中崎西2-6-3 pastal I 101號電話：+81-6-6131-4171營業時間：11am-9pm網址：
http://www.taiyounotou.com/ultrajam
交通：地下鐵中崎町站步行4分鐘
大阪Coming up
固力果跑男熄燈 功成身退
每次去到大阪，少不免都要去到道頓堀河旁嘅固力果燈牌影相，原來呢個燈牌於1935年已經喺道頓堀出現，而家見到呢位大叔係第五代跑男，不過因為看板太舊而要重新設計，8月17號已經熄燈，所以而家去大阪再唔可以同佢拍照留念！至於第六代跑男幾時會出現？固力果公司就話仲設計緊，希望可以喺今年秋天同大家見面。
大阪烏冬博物館秋天開幕
烏冬深受香港人歡迎，今年秋天大阪烏冬博物館正式開幕，形式就好似橫濱個拉麵博物館，來自日本各地嘅老店都會於博物館內開舖，可以一次食到盡，仲可以體驗親手製作烏冬嘅過程，有得食又有得玩。大阪烏冬博物館預計會在10月底於心齋橋美國村內開幕。網址：
http://udon.mu/osaka-minami
旅遊資料簽證：持特區護照及BNO均毋須簽證，可逗留90天。機票：日本航空每天有四班與國泰聯營直航機來回大阪關西機場，大阪激安遊套票機票連兩晚富士屋酒店，約$3,430起/位，查詢：日航天地旅遊；網址：
http://www.jalselect.com.hk
；電話：3429 1288交通：由機場前往市內可乘坐南海電鐵或JR。市內交通工具主要為地鐵及JR。建議先於車站購買ICOCA卡，等如八達通，省卻每程買票的麻煩。貨幣：100日圓約兌HK$7.6（文中價錢以此匯率計算）天氣：8月份大阪氣溫介乎攝氏28-30度。時差：比香港快1小時。鳴謝：日航天地旅遊SATELLITE TRAVEL
撰文：關錦雯攝影：陳偉傑
