混血女模Jessica C.昨日以tube dress性感出席手機遊戲活動，她自爆愛與男友玩Cosplay，更有意打扮成中國古代美人妲己給男友驚喜，增加生活情趣。
性感上陣的JC自爆愛跟男友玩Cosplay。
「警鐘胸」名模Jessica C.（JC）昨日聯同大隻男模趙勁皓（King）出席人氣手機遊戲《神魔之塔》假會展舉辦的「男神女神『相』接觸」活動，以tube dress性感示人的JC與King跟Cosplay女生大玩自拍及打遊戲機，表現投入。JC坦言不愛自拍，因為自覺其自拍技術仍有待改善，但就愛玩Cosplay，她興奮地說：「我鍾意扮啲性感得嚟又可愛嘅角色，男友都鍾意我著Cosplay。（你會扮咩角色畀男友睇？）我想扮妲己，因為一般女友都係扮護士，妲己係中國古代角色，男友唔熟悉，會畀到驚喜佢。（妲己喺歷史上係壞女人？）只係角色啫，但我係好女人。」
開心拍首部大陸戲
另外，早前《好報》獨家報導有內地電影公司出價千萬元簽JC，她坦承將在北京逗留數月拍攝她首部大陸電影：「我都好緊張，而且會好掛住香港，我會上演戲課程同學國語作好準備。」問她是否已正式簽約？她未有正面回答：「總之將會有啲事發生，嚟緊有好多計劃。（對方係大公司？）其實我唔在乎間公司大定細，最重要畀到機會我喺內地發展，有時大公司反而唔會放咁多注意力喺你身上。（千萬酬勞？）幾多錢我唔知，但我可以喺北京發展好開心，因為我鍾意北京。」
JC與King大讚現場的Cosplay女郎型格十足。
JC與King一個健美，一個健碩，誰也搶不了誰的風頭。
趙勁皓當女友助理
至於King表示熱愛打機：「等埋位嘅時候，打機係最好嘅消磨時間方法。（女友盧頌之唔鍾意你打機？）係呀，但我同佢拍咗一年拖，感染咗佢都打機。」提到他在活動中挑選Cosplay女郎時都揀上圍豐滿的女生，會否怕女友呷醋？他乘機大讚女友：「唔會，佢好大方，做嘢難免會同啲性感女仔合作。（報定案？）我會同佢講，佢有曬我嘅工作時間表，因為可以幫我安排工作同接嚇job，當係助理咁。（做埋你經理人？）唔會，我做佢經理人就差唔多。」
文：名人組
From:
http://orientaldaily.on.c ... /00282_070.html
