書展昨日正式開鑼，一班寫真戰士踩行油各自為寫真造勢。被視為寫真女王大熱的蕊蕊昨日裝好F Cup導彈一打十一o靚模，面對AD2成員Amy（艾美琦）等9女於街頭騎呢玩波及剝衫，以及兩位「過江龍」金愛妍與清穗久美子派甜品餵粉絲，她依然未驚過，還寸爆指︰「我唔會做多餘嘢！」
蕊蕊樣靚身材正，被視為今年寫真女王大熱之選。
寫真戰昨日揭開序幕，一如以往，各「露」參賽者力求爭贏「寫真女王」寶座，騎呢招盡出。今年寫真戰大熱的蕊蕊昨日拋胸現身書展為其寫真電子書作宣傳，期間不時把男友金剛掛在口邊曬恩愛。她說︰「依家感情穩定，Keep住咁樣都覺得好舒服，佢又冇畀壓力我，好多地方都支持我，我放心去專注我嘅工作。」她又稱沒過問寫真銷量，身邊朋友睇完有讚無彈，故心思思想下年再出。她說：「本身諗住係最後一次，但依家見到咁靚，都心動想下年再影。」問她下年會否升級影大肚寫真？她笑說：「呢啲一定係意外嘅嘢。不過應該就唔會，好安全嘅我哋。」
AD2世紀騙案
另邊廂，騎呢組合AD2成員Amy（艾美琦）昨日就偕兩位o靚模Ivy及巴拉莎到灣仔街頭剝衫和玩波，早前揚言是封胸前最後一脫三點盡露，但最後上演「世紀騙案」。當眾女準備脫上衣時，工作人員突然叫停改玩沙灘波。未幾與Amy傳不和的Super Sexy Hero成員Angi（鄭思彤）率領其餘5位成員Psyche、Sabina、Keely、Phoebe和Mars來踩場，Amy見狀即把波拍向Angi頭部，Angi即還擊，最後演變9女於街頭「混戰」，事後Amy與Ivy齊齊鬧爆Angi的行為。之後Amy繼續除衫，但原來只是在tube dress胸前畫上兩點。對於「世紀騙案」，Amy尷尬稱︰「我想同大家玩嚇。」
Angi被波掟中，即不忿向Amy還擊，上演一場大龍鳳。
金愛妍（左）與清穗久美子大派甜品冧粉絲。
Amy當街除衫被指是「世紀騙案」。
昨日蕊蕊低胸上陣，未有出騎呢招數博出位。
對於一眾對手各出奇謀博出位，蕊蕊昨日於電話中直言未驚過，還寸爆地說︰「人哋咁做我阻止唔到，都幾成功有noise，但人哋唔代表我會咁做，我唔會做多餘嘢！」她直言未有留意其他對手的寫真，並寸爆Amy︰「唔係你哋講，我都唔知佢有出寫真，我冇留意佢哋！」另外，昨日蕊蕊的寫真銷量達一萬五千本，贏盡一班「胸」模，難怪她一個打十一個依然相當淡定，勁過「一打十」的「宇宙最強」甄子丹！
文：專案組
From:
http://orientaldaily.on.c ... /00282_008.html
