宣稱玩改革、玩創新嘅亞視，最近喺深夜增設咗一個《子夜特區》，喺週一到週五晚播映唔同話題嘅成人節目，噚日有報導話，喺前晚錄影嗰集《女人不設防》，其中有一part介紹性玩具，點知主持楊玉梅覺得內容太露骨，即時同監製理論，結果最後改由綠魔頂上。
有份做嘉賓嘅綠魔（右），噚日笑笑話臨時頂上做主持。
本來係由羅霖負責
噚日馮仁昭打畀楊玉梅八卦嚇呢件事，佢喺電話度話：「佢哋最初同我講，只係話講嚇時下啲人點樣越軌、車震同偷食，本來講性嗰part就由羅霖負責，我唔知佢因乜嘢原因推咗，點知監製突然間同我講要拍，我聽完都O曬嘴，我真係做唔到！」楊玉梅話當時氣氛都有少少僵，大家都為咗呢件事鬧到面紅耳赤：「嗰陣我自己差唔多反枱推凳，好似佢之前都叫我去派condom，再加埋介紹性玩具，呢啲真係過咗我底線，其他人都怕我哋都大打出手，叫我哋行開嚇緩和啲氣氛，最後總算無事！」佢仲話：「其實我只係拍4集，𠵱家已經拍曬，如果之後再搵我拍，我會講明曬要拍啲乜嘢，寧願先小人，後君子。」
嗰晚有份做嘉賓嘅綠魔，噚日喺中環嘅活動，亦都有講呢件事，佢話：「楊玉梅拍到啲part話好尷尬，接受唔到而離座，跟住拋咗個波俾我，我唔知佢點同監製傾，但係我講多咗，可唔可以加番多啲人工？」
亞視發言人就話：「主持同製作組有共識，大家冇不歡而散。」
【
From:
http://hk.apple.nextmedia ... 140711/18795633
