男神變醜男，街市搞搞震！兩大影帝謝霆鋒及張家輝放下男神包袱，為拍攝飲食節目而施展易容術，霆鋒施「髮」變「戇版披頭四」，而張家輝則戴假牙做「爆肌牙擦蘇」。這對騎呢孖寶踩入街市揀魚、買菜、掃生果做煮飯公，本以為微服出巡可以瞞過街坊，怎料被菜檔老闆娘一眼認出家輝，並向他一對強而有力的臂彎抽水，果然有師奶Market！
家輝化身「爆肌牙擦蘇」，與霆鋒的「戇版披頭四」相映成趣。
謝霆鋒的內地飲食節目《十二道鋒味》先後請過不少巨星擔任嘉賓，繼范冰冰、Angelababy、趙薇等一嘗霆鋒手勢後，今次再輪到好友張家輝有食神。前日早上約十一時，他們玩買餸快閃，突擊九龍城街市拍攝節目，但兩大影帝不在銀幕鬥戲，反而整古作怪落區鬥騎呢！
隨行人員狂笑
霆鋒與家輝為吸引更多食「嚇」，不惜打爛男神金漆招牌，由型男降呢做醜男。雖然霆鋒近期的穿窿露底爛牛仔褲再成為熱話，但他今次唔行「股」惑，改戴七十年代娘爆假髮及懷舊烏蠅眼鏡，十足「戇版披頭四」。家輝更加豁出去，戴上假哨牙及老土眼鏡，變身見牙不見眼的「爆肌牙擦蘇」，笑聲可謂傳遍街市。
難得家輝與霆鋒大駕光臨，女檔主即捉實家輝手仔唔願放。
兩大影帝不停講笑加上趣怪造型，令Mani笑到停唔到口。
二人早在保母車上變裝時，經理人霍汶希（Mani）與隨行工作人員對他們的騎呢Look已忍不住大笑。雖然他們今次大玩喬裝微服出巡，可是拍攝期間依然被不少途人認出，當街坊舉機拍照時，都被工作人員勸止，以防新Look曝光。
霆鋒與家輝揀海鮮時指手畫腳，非常認真。
未變妝的霆鋒低調地抵達九龍城。
化身「驗Sea官」
其後一行十多人的攝製隊走入街市，他們先到菜檔揀蔬菜。雖然霆鋒與家輝經過悉心打扮，可是仍被眼利的老闆娘認出，難得兩大型男大駕光臨，老闆娘落足嘴頭hard sell不特止，更來一招「獨家試菜」，捉實家輝的手仔唔放，恨死其他女街坊。
之後他們再到魚檔揀靚海鮮，對海鮮有要求的霆鋒變「驗Sea官」，在魚檔左揀右揀，不時拎起花蟹檢查新鮮程度，最後揀選了一塊銀雪魚片。這次快閃之旅最後一站是到街市對面的水果店，揀好靚生果後便收隊回去，正式下廚炮製九大簋！
from:
http://orientaldaily.on.c ... /00282_001.html
