為咗拍廣告可以去到幾盡？方力申就因為接拍咗個內地內褲廣告，足足進行咗4個月嘅地獄式訓練，搖身一變化身爆肌男，仲著埋五顏六色超緊身底底晒「巨雕」，而女友鄧麗欣（Stephy）都對男友爆肌look感滿意，仲話佢毅力驚人添。
小方身形不嬲有啲「肉地」，而佢平時有做運動，但今次突然嚟個咁大轉變，連佢自己都話：「咁多年嚟從來冇諗過會有腹肌」。
至於網民對小方突變爆肌男意見不一，有網民讚操得勁，但同時有啲就話睇唔慣﹑個身乾得滯，而內褲廣告嘅髮型及「巨雕」，更惹人談論，指髮型好怪，同造型唔襯；而且「攝嘢」太多，裝假狗裝得好覺眼。
而絕大部份網民睇唔慣爆肌版嘅小方，以及勁過碧咸嘅「巨鵰」，於是網民又一時「技癢」，發揮無限創意，忍唔住將小方變成「變形俠醫」，甚至將佢變咗做格鬥game嘅角色，同超人「對打」等等；
亦有網民將佢嘅爆肌再升呢120%，勁過日本動漫《幽遊白書》個戶愚呂...真係點改都得。新一代萬能key咁就誕生，馬德鐘﹑陳奕迅後繼有人啦！
小方本人又點睇呢？佢昨日就拎住本雜誌做運動，又張貼《蘋果日報》報道，佢話：「今天報紙一出，壓力也同時來了，要重新積極訓練，要不就貨不對辦喇！加油吧！」
from:
http://hk.apple.nextmedia ... 140514/18719390
