歌仔都有得唱：「世上只有媽媽好。」不是說爸爸不好，只是媽媽在子女心目中地位更高。今日母親節，群星與仔女紛紛出動慶祝。身為單親媽咪的美魔女羅霖以及連詩雅母親，日前分別與子女到迪士尼享天倫樂，羅霖孻仔劉子晉窩心一句「我愛你」，足以令羅霖冧爆說：「囝囝錫我一啖，乜嘢煩惱都冇晒，幾辛苦都值得。」萌爆的美心妹妹楊鎧凝向媽咪送上自製的「一塌糊塗」蛋糕，逗得媽咪開懷大笑。至於剛為人母的名模Cara G.，則為初生囡囡打腳印仔留念。
現年48歲的美魔女羅霖前年與商人劉坤銘離婚，但她未感失意沮喪，為了三個兒子，羅霖決定重新出發，積極工作搵錢養家，就算拍攝情慾片也在所不辭。日前，羅霖抽空帶細仔劉子晉到迪士尼遊玩賀母親節。8歲的子晉表現乖巧，不時與母親錫錫，其間子晉更扭在媽咪懷中大講「我愛你」，令羅霖勁冧說：「囝囝錫我一啖，乜嘢煩惱都冇晒，幾辛苦都值得。」
囝囝錫錫羅霖並講「我愛你」，冧爆的她笑言自己往後幾辛苦也是值得。
今年是羅霖第二年過單身母親節，她表示已經習慣：「第一年都會唔慣，始終結咗婚18年，今年已經完全習慣。每個做咗媽咪嘅女人都會堅強，以前我好依賴屋企，因為自己係孻女，爹哋、媽咪同家姐都好照顧我，𠵱家已經好獨立，乜事都會以囝囝為第一位。」今日母親節，羅霖會跟家人食飯，她說：「其實唔需要特別慶祝，只要見到小朋友乖同開心快樂成長，將來大咗起碼一星期食一次飯，我唔望子成龍，佢哋負責任、可以照顧自己之餘又做到義工，咁樣每一日都係母親節。」
包容兒子反叛期
羅霖視三子為心肝寶貝，縱使大仔與二仔正開始反叛期，她都十分體諒，忍耐與包容是她座右銘，羅霖說：「大仔反叛咗一年，𠵱家已經好乖，二仔反叛咗四年，仲反叛緊，佢哋大個仔有自己一套想法，作為母親，最緊要有耐性同一個字，就係忍。」
from:
http://hk.apple.nextmedia ... 140511/18716040
