噚日係偉大嘅母親節，眾星喺微博貼媽咪合照晒母愛，原來蔡卓妍（阿Sa）同徐嬌嘅媽咪都好後生，阿Sa同媽咪餅印一樣，兩母女都有酒凹鬼咁cute；至於陸永就貼咗老婆同囡囡嘅相，陸永嫂雖然做咗兩女之母，依然好靚好省鏡，網友都勁讚陸永嫂好銷魂，難怪陸永得戚留言：「我老婆最多像她們的大姐姐，那裏像她們的媽媽呢？哈哈！」
張智霖飛澳洲賀母
至於張智霖就特登飛去澳洲同媽咪慶祝，認真廿四孝，老婆袁詠儀𠵱家喺青島開工，冇得同囝囝魔童慶祝，但就收到魔童嘅手作畫做禮物；同樣係港姐冠軍嘅李嘉欣亦貼咗錫錫媽咪相，留言：「成為母親後更加佩服，媽媽您到底是怎麽走過來的！」
李嘉欣（右）亦貼咗錫錫媽咪相，場面相當溫馨。
微博圖片
擁有女神Angelababy做女友嘅黃曉明，心目中嘅女神原來係佢媽咪，曉明留言：「我的媽媽是女神！媽媽的美掩於歲月，但是媽媽永遠占（佔）據我心中最美麗的地方，願歲月溫柔以待。」陳坤同樣視媽咪為女神：「祝所有母親幸福健康。她們給我們生命，應該是我們不變的女神。」另外，蔡少芬大女楚兒噚日3歲牛一，佢哋一家四口去迪士尼慶祝埋母親節，姚瑩瑩帶囝囝到賀，玩得好開心。
from:
http://hk.apple.nextmedia ... 140512/18716932
