黃浩然同姚子羚二人於無劇《愛我請留言》中飾演一對閃婚夫妻，一家三口有個女，睇好似好幸福，但其實悲劇收場，無法一起走下去。但現實中，靚仔黃浩然依然靚仔，不過真實家庭就幸福得多囉。
於2005年同拍拖四年女友莫家嘉結婚，絕對唔係閃婚，慢慢計劃好後，於2011及2013先後誕下兩子做爸爸，一家四口幸福到無倫。
冇耐前好姨先銅鑼灣見到黃浩然同太太拖手仔行街街，鬼咁恩愛。黃浩然呢個廿四孝老公真係好服侍到不得了，陪住老婆去買化妝品，又好有耐性聽售貨員講解，真係冇得頂。
本來好姨行過就算，都冇諗住咁八睇佢之後會做咩，點知一個轉頭，又俾好姨銅鑼灣利園撞到黃氏兩公婆，不過今次就多個「黃生」出現。呢位黃生就係黃浩然個仔喇，原來浩然個寶貝仔附近去Play group上課，呢頭浩然陪完老婆去「濕平」，呢頭又去湊仔放學，呢個男人認真靠得住。
