現年56歲嘅影帝梁家輝同50歲嘅老婆江嘉年結婚27年依然恩愛，前日佢哋帶住23歲孖女一齊去咗台灣度假，仲一家四口喺台北敦化南路巷內行街，家輝兩公婆雖然年過半百，仍然非常恩愛，全程行街都十指緊扣。前日下晝4點幾，首先見到身為老竇嘅梁家輝同太太陪住兩位囡囡喺一間服裝店買衫，當時兩位女兒正忙住試戴帽子、試背囊，家輝都充當佢哋嘅服裝顧問。經過接近30分鐘選購，家輝先幫女兒找數，之後仲負責幫囡囡拎住兩大袋戰利品離開，可算係模範老竇嘅典範。
雖然係老夫老妻，但家輝同老婆依然十指緊扣行街。
夫妻十指緊扣
離開時裝店時，打扮新潮嘅家輝着住白色帆布鞋，一直十指緊扣拖住老婆江嘉年，就好似年輕情侶咁恩愛。一家四口漫無目的穿梭巷內，見到合適嘅櫥窗就停喺度欣賞，休閒程度似足遊客行街。佢哋喺敦化路一帶前後行咗個幾鐘，跟住去到就近嘅便利商店買一啲小食同日用品之後，就好熟練咁行去忠孝東路截的士直駛去寒舍艾麗酒店，家輝好體貼咁俾太太同女兒先落車，自己就負責畀車費同殿後嘅責任，跟住仲快步追上去搭電梯上樓。
from:
http://hk.apple.nextmedia ... 140502/18706769
