韓國神劇《來自星星的你》熱爆中港台，兩位男女主角全智賢、金秀賢搵錢搵到冇停手，上個禮拜雙賢分頭出動，全智賢去上海出席護膚品活動，上台亮相八分鐘，兩年代言勞酬加宣傳活動，賺咗800萬人仔；至於金秀賢就飛咗去台灣舉行粉絲見面會，佢仲專登梳番個必殺《星星》齊蔭頭，兩日活動，袋走200萬港幣。
一個去台灣搵台幣，另一個飛北京賺人仔，李鍾碩（左）仲學金秀賢梳咗個齊蔭頭冧粉絲。
其實《星星》唔單只帶旺雙賢，連佢班同鄉照樣受惠。身為韓國五大男神之一嘅李鍾碩，上個禮拜四（三月二十日）飛咗去北京，孖住國產一線花旦劉詩詩，出席鞋履品牌Millie's活動。見金秀賢個《星星》頭人見人愛，李鍾碩有樣學樣，同樣以齊蔭頭亮相。
憑韓劇《學校2013》以及《聽見你的聲音》爆紅，聽講李鍾碩今次飛京酬勞有100萬人仔，嚟緊仲會飛嚟香港，孖住周潤發現身HUGO BOSS活動，又多七位數字酬勞落袋。既然唔知呢股「發錢韓」熱潮可以keep幾耐，梗係搵得一蚊得一蚊啦！
上個星期五（三月二十一日）金秀賢飛抵桃園機場，現場已經有過千粉絲恭候，大會要出動170名保安護送都教授離開。
由model仔升呢成為韓國五大男神，連心有吳奇隆嘅劉詩詩，都忍唔住偷𥄫李鍾碩。
全智賢上海吸金，唔使搞咩花樣，一對長腿已經夠殺。
