俗語謂「一人得道、雞犬升仙」。就講《來自星星的你》，因劇集火爆、紅遍兩岸三地，主角金秀賢同全智賢人氣當然更上一層樓，連帶劇中一眾配角演員亦聲勢大旺。其中人氣上升得最厲害嘅，當非飾演富二代李輝京嘅朴海鎮莫屬。朴海鎮喺劇入面對千頌伊嘅痴情，不單成功將逃兵嫌疑犯變暖男，更晉身「韓國男神集團」一分子，新劇、廣告代言和寫真集接到手軟，亦極速吸納一大批強國粉絲。除應邀做湖南衞視《快樂大本營》嘉賓外，更獲中國著名時裝設計師Mark Cheung邀請合作推出「朴海鎮品牌」。賺人仔賺到笑。
身高186cm、擁有42吋胸嘅朴海鎮，完全標準男神身材。
富二代李輝京對千頌伊直頭係「痴心情長劍」，因角色討好，令粉絲有代入感，朴海鎮間接「為愛而生」。
朴海鎮早前出席湖南衞視《快樂大本營》，喺節目上面，以其半鹹不淡普通話𠱁到主持同粉絲鬼咁開心。
Mark Cheung
李輝京對千頌伊一心一意，雖未奪得千頌伊芳心，卻俘虜無數粉絲嘅愛。原來朴海鎮能演李輝京其實有段古㗎，話說李輝京嘅角色本來屬意崔敏出演，而朴海鎮則演壞蛋二哥李載京，點知臨到埋位，崔敏意外受傷，導演臨急搵朴海鎮頂替，而李載京則由申成祿頂上。諗唔到因角色討好，令孭住「逃兵嫌疑」而潛水幾年嘅朴海鎮成功翻身。
今年2月，朴海鎮為《In Style》創刊11周年紀念特別企劃拍攝咗一輯捐贈寫真，以救助社會弱勢社群。
11年，朴海鎮曾喺中國拍劇，其中跟李小冉（新娘）合作嘅《錢多多嫁人記》稍具知名度。
朴海鎮於24號（周一）出發到北京出席「國際時裝周」。
涉偽造病歷
朴海鎮同李鍾碩拍緊新劇《異鄉人醫生》，今次佢飾演善良正義嘅心臟科醫生，而李鍾碩係以天才醫生身份喺韓國醫院工作嘅脫北者（右）。
朴海鎮06年出道，即憑電視劇《傳說中的七公主》走紅，更獲「國民年下男」美譽，之後出演三部劇，亦三次獲得韓國演技新人獎。但09年，朴海鎮卻涉嫌以患「精神分裂」假病歷逃避兵役，因而被國民抨擊，被演藝圈封殺，其後更被經紀人公司解約。
朴海鎮被迫消失幾年。11年曾到中國發展，也先後拍過幾套劇，但持續人氣低迷。直到12年喺韓國演藝界先再蒲頭（韓國兵役條例就算有逃兵之嫌，但若案件已過5年追溯期，則不須再負任何刑事責任）。朴海鎮雖逃過刑責，但人氣已不再，要由主角淪為配角。但世事卻係估你唔到，竟然俾佢執到李輝京角色，對朴海鎮嚟講，簡直係「天上掉下一個大餡餅」。
人氣翻紅嘅朴海鎮食住《星星》氣勢，除跟李鍾碩合拍新劇《異鄉人醫生》外，更成為強國搶手貨，與李敏鎬及金秀賢鬥搶人仔。
逃兵無運行喺韓國，男仔到咗26至30歲，一定要服兵役，理你係天王巨星一樣冇得走雞。所以韓國國民對男藝人有句諺語：「逃兵失粉絲、好兵人氣升」。玄彬、李準基及孔侑就被視為「好兵」，而逃兵後果頗為嚴重。
唔講唔知，朴海鎮原來好鍾意高達玩具同收集唔同品牌嘅波鞋，尤其波鞋多到可以開鞋舖，認真誇張。
演藝界逃兵
劉承俊—98年叱咤韓國樂壇，01年以腰椎手術判定替代役。誰不知原定02年5月入伍嘅佢，竟然於2月放棄韓籍，更攞到美國公民權，因而被法務部裁定其刻意逃避兵役，禁止再踏足韓國。03年他因家人喪禮破例讓其入境，喺機場大堂俾身着軍服男人擲雞蛋。自此後劉承俊再未能踏足韓國半步。
宋承憲—以「假病」逃避兵役，其後雖公開道歉及賠償上億廣告違約金外，手上劇集全遭換角。
韓在石—遭KBS電視劇《海神》換角，而人氣更低迷到現在。
張赫—被SBS劇集《天堂咖啡館》換角，演藝事業亦停頓一段日子。
