蔡少芬（Ada）同老公張晉近年嘅事業發展順利，有兩個得意妹楚兒（湯圓）同信兒（包子）組成幸福家庭，Ada乘勢開創另一事業，佢早前同朋友合資推出童裝品牌「童夢工場」，喺金鐘及銅鑼灣百貨公司設櫃位，雖然只係開咗兩個幾月，但話咁快月中會喺尖沙嘴山林道開地舖喇！
蔡少芬嘅童裝生意越做越大，十二月喺尖沙嘴開地舖。微博圖片蔡少芬同張晉生咗可愛嘅湯圓同包子，幫手做童裝嘅生招牌。微博圖片
囡囡做生招牌
Ada日前喺電話中話：「今次租地舖會貴啲，但價錢都算合理，金鐘嗰邊生意好，食住個勢嘛，希望喺聖誕節前開張，除咗可以快啲做生意外，亦都想啲小朋友有得扮靚靚過個精采聖誕節。」咁今次再投資幾多錢？Ada話：「唔使再夾錢，開地舖係我哋計劃之內，希望將來唔同地區都有分店，不過會逐步嚟，打好基礎先，同埋我哋亦好注重產品嘅質素。」
為咗盤生意，Ada親力親為，不時巡舖緊貼顧客心意，佢仲講笑話：「我就賣樣做生招牌，湯圓同包子就幫手賣萌！」呢兩個得意妹確係幫到手㗎。
from:
http://hk.apple.nextmedia ... 131202/18532448
