近年喺內地成為搶手貨嘅劉愷威，唔止事業一帆風順，愛情都修成正果，早前佢就宣佈同拍拖多年嘅內地女星楊冪結婚，仲會喺下個月8號擺喜酒，真係可喜可賀。不過因為劉愷威同楊冪𠵱家喺內地都係當紮，咁突然同埋咁急宣佈結婚，難怪外界盛傳楊冪有BB，但當事人就對傳聞不置可否喎。
劉愷威同楊冪突然宣佈結婚，令人揣測奉子成婚。
已領結婚證
大前日楊冪秘密飛到上海掘金，佢一身全黑打扮，着住厚褸同貼身長褲，戴住黑超星味十足。楊冪身形一向瘦削，當日佢嘅身材冇乜大改變，不過似乎刻意着上厚褸遮住身形。
除此之外，仲見楊冪左手上面戴咗一大串佛珠，唔知係咪想保佑大小平安呢？問到婚禮進展成點，楊冪都大方承認：「已經和劉愷威領證。」再追問係咪奉子成婚，楊冪就冇承認又冇否認喎，似乎有啲此地無銀嘅感覺。
from:
http://hk.apple.nextmedia ... 131123/18519984
