四眼妹化妝，有苦自己知，即使又瞇眼又湊近鏡子，眼線都會畫到出界，睫毛液又會塗得「一餅餅」，妝容像是去參加萬聖節派對似的──鬼五馬六。這時候化妝眼鏡（圖）正好大派用場，讓抗拒戴隱形眼鏡的你化妝更得心應手。
化妝眼鏡與普通眼鏡不同之處，在於只有單邊鏡片，分150、200與250三種度數。鏡片採取雨撥式設計，化左眼時可以將鏡片撥往右邊，化右眼時就撥鏡片往左邊，讓一隻眼保留清晰視力，這樣化日常淡妝就可以更加細膩動人，化晚宴濃妝就可以更大膽浮誇。
不過化妝眼鏡用途不夠廣泛，加上造形趣怪，大庭廣眾戴着它實在略嫌「騎呢」，只怕惹人發笑，似乎不太適合愛在車廂打扮的都市人，有網民建議倒不如隨身帶塊迷你放大鏡，出門時更方便。
