近兩周賣樓越來越多發展商加入破辣條款，有部份全部回贈雙倍印花稅，亦有部份回贈五至七成買家印花稅，反映發展商對樓市亦見不妥，提早散貨套現。
早前遇見美聯一地區董事，閒聊兩句，原來資本策略剛發出銅鑼灣yoo residence最新24伙價單，也推出類似回贈，擺明對個市投不信任票，避免被兩大尖沙嘴豪宅盤吸乾買家，走得快好世界，賣晒先至袋袋平安。四大發展商包括長實、新地、新世界和恒地有能力賣樓仍賺大錢之外，其餘「二打六」角色除因發展成本高，又沒有自己的建築團隊，在地價和建築費蠶食利潤，再等下去隨時賺錢變蝕錢，既要向銀行還錢又要籌錢發展下一項目，條數計唔掂，自然要散貨套現。
二手樓業主縛好安全帶
新盤可以散貨，散戶卻無助，過去兩周新盤主導市場後，二手市場簡直如死城，買家都唔多個，買家多被新盤搶去。究竟目前樓價仍在高位，難怪發展商都要斬倉，二手樓估計要縛好安全帶，擔心風大雨大，經不起風浪的小業主出現恐慌性拋售。
單以現時中原城市領先指數的成份屋苑卻未能反映大部份現況，好多劈價盤為新興豪宅或入伙數年的新屋苑，成交故未能被參考，同時藍籌屋苑成交少，數據不平均，局外人難掌握市況的全部。在此補充該指數仍是全港最有代表性，但可以改善。
劉兆昌
from:
http://hk.apple.nextmedia.com/financeestate/art/20131027/18480806
