佘詩曼、陳敏之同森美噚日喺九龍灣拍攝劇集《使徒行者》節目巡禮，佢哋三個着到靚一靚喺架林寶堅尼前面擺chok樣，引嚟唔少途人圍觀影相，不過着住low cut短裙騷長腿嘅敏之，就比着黑色連身裙嘅阿佘搶鏡好多啦！佢哋除咗拍chok樣之外，仲拍咗場阿佘幫溫裕紅助選派傳單嘅戲份，阿佘話今次個角色好有挑戰性：「個角色未講得住，不過好好玩好有挑戰性，自己未演過。」
敏之着住性感low cut短裙上陣，成功撼贏阿佘。森美、佘詩曼、陳敏之齊齊為劇集《使徒行者》拍攝節目巡禮。
同林峯做情侶
阿佘又透露《使》劇除咗同林峯做一對外，仲會同三哥苗僑偉有對手戲，講到簽番無綫後嘅感覺，阿佘就形容好似返咗屋企咁：「多咗湯水飲多咗嘢食，好溫暖，唔似出面認識新朋友。」有傳佢同個六呎男拍拖拖手，阿佘就澄清同對方只係工作關係：「因為我屋企呢排裝修，我搵佢幫我畫條魚，當日只係佢幫我擺啲畫上架車，畀番條車匙我啫。」
另外，森美早前擔任樂施大使，呼籲大家多啲返屋企食飯，因為既可享受同家人相聚嘅時間，又可以食得健康。
from:
http://hk.apple.nextmedia ... 131014/18462472
