日本歌姬濱崎步新碟失收，韓國天后崔智友都唔好得去邊。好耐冇拍電視劇嘅崔智友，今年復出熒幕，演出月火劇（周一、周二晚播出）《奇怪的保母》。《奇》係改編自日本人氣劇、松嶋菜菜子主演嘅《女管家三田》，崔智友就飾演外表冷漠，見到牛爬樹都唔會笑嘅保母，由造型以至性格，都係照copy《女管家三田》嘅松嶋菜菜子。
松嶋菜菜子憑《女》劇人氣反彈，而《奇》劇就算掹到一哥李政宰助陣，但播到第四集，收視平均只得6.9％，反而同時段、新人朱元主演嘅《Good Doctor》平均收視都有20.3%，咁就令一心想喺韓國演藝界再闖高峰嘅崔智友非常無癮。媽咪姐好明白智友姐心情嘅﹗
38歲嘅崔智友自從11年同細佢6歲嘅李真旭分手後，再冇聽過佢拍拖，工作亦停滯不前。
《奇怪的保母》講冇咗媽媽嘅4兄妹，跟爸爸（李政宰飾）及神秘保母（崔智友飾）之間發生嘅事。
崔智友飾演嘅保母，由造型、服裝，甚至連表情都同松嶋（右）似到十足十。
