幸福人妻陳慧琳（Kelly），事業一帆風順未受挫折，一切看似得來很易。日前她獲邀擔任《亂噏24》嘉賓，自爆當年在日本做麵包妹時被鬧經過，從此學懂處事嚴謹認真，助她踏上成功之路。
陳慧琳日前擔任《亂噏24》嘉賓，自爆曾在日本做麵包妹，因做事馬虎而被鬧。
（左起）蔡瀾、Kelly及肥佬黎風花雪月，甚為投契。
對陳慧琳而言，這次錄影絕對是最舒服一次，因地點距離屋企只有一街之隔。作為黎智英（肥佬黎）的「老鄰居」多年，真正到訪還是第一次。Kelly乘機四圍參觀，問起他的私家游泳池時，肥佬黎答：「冇啦，冇咗。我以前僭建咗個grass house，後尾我主動拆咗佢。」傳媒大亨要揭發高官僭建，當然要以身作則奉公守法，要不然便「有口話人，冇口話自己」。肥佬黎笑說：「喂大佬我做呢行，咁樣搞人！」
開騷簡直是噩夢
Kelly入行近二十年，星途暢通無阻，幾乎未經歷過低潮，原來一切都是出於偶然，她從未發過明星夢：「早知我細個發明星夢，我就學多啲嘢！廿幾歲先嚟學唱歌，咪一路做一路學囉！」她的歌唱成就遠超於電影，但她較喜歡拍戲：「拍戲冇唱歌咁緊張，因為拍戲可以NG。上到台唱歌，衰咗就衰咗，壓力大好多。」演唱會對Kelly來說簡直是噩夢，她七情上面的演繹箇中辛酸：「最辛苦呀！嘩！得唔得都係你承受晒！得嗰陣時梗係得，唔得就受晒落個肚度。」處女座的她自稱是完美主義者，每處細節都要挑剔，令壓力倍增，故如今最想拍喜劇，嘻嘻哈哈又一日。
現今樂壇沒落，有人歸咎填詞人水準低，有人指歌曲旋律複雜，難有深刻印象。歸根究柢，歌手青黃不接才是主因，有些甚至連咬字也不清。蔡瀾說：「有字幕都好啲，冇字幕我真係聽唔到佢唱乜嘢，此其一。第二，唱一句，索一口氣，好似肺癆病咁！中間啲口水聲係多到無倫。」肥佬黎認為很容易分辨歌手是否識唱歌：「你覺得佢唱得好辛苦，你又聽得好辛苦，因為佢夾硬谷啲聲音出嚟，而唔係自然走出嚟。」蔡瀾認為昔日歌手大多具備唱歌條件，連說話發聲都有異常人：「好似梅艷芳，佢講嘢嘅聲唔係我哋呢啲嘅聲，好似鸚鵡聲。」
肥佬黎指某些女人是支配狂，Kelly急急否認。
演唱會對Kelly來說是噩夢，提起都七情上面。
已為兩子之母的Kelly，不抗拒做人母角色。蔡瀾醒起日本電影《字裡人間》飾演老主編妻子的女演員八千草薰，如今已八十多歲，一樣活到老演到老：「演咗無數電影，好靚，佢哋話日本女人，漂亮、賢淑，就係呢個人。」他認為只有日本人才拍得出這樣的電影，是認真和敬業樂業，慨嘆中國人做不到：「或者我哋嘅民族性，中國人比較『呢啡』啲。佢哋認真啲，但係好痛苦。」肥佬黎笑言中國機師撞機的機會或許比其他民族高，因中國人處事太馬虎：「就算日本仔攞咗我哋好多嘢返去，都做得好過我哋。拉麵以前都係學我哋咋嘛！」
Kelly當年在日本留學其間，曾到麵包店做暑期工，對日本人的民族特性感受很深：「收銀隔籬咪有個人專係裝麵包，咁我中國人啦，求其將啲麵包嘭嘭嘭嘭掉晒落去，結果俾人鬧！我心諗求其得啦！」Kelly盛讚日本人注重整潔，連公廁也非常乾淨。肥佬黎稱他在加拿大的酒店，假若客人退房，房間東西原封不動的話，必定是日本人：「如果係內地人，你梗係唔見啲毛巾呀，唔見呢樣嗰樣呀。如果張凳擺到落篋，佢都想攞埋你走！」雖然中國人的劣根性臭名遠播，但其實不少人默默捍衞其名聲。肥佬黎又自爆在機上如廁的習慣：「有時睇吓自己小便有冇滴喺地下，你都用嘢抹咗先走，唔好意思呀大佬！」
Kelly的歌唱事業一帆風順，背後也付上努力。
蔡瀾認為去旅行也得講運氣。
最怕被當強國人
肥佬黎一提強國人便越說越氣，他最近一次到訪日本，在機場見到兩名內地遊客在揀衫：「衫裏面有張紙，佢可以揀到全個地下都係紙！嘩我睇到即刻走，唔係個個都當我中國人咁點搞！」蔡瀾認為去旅行也得講運氣，就如他年輕時去韓國，碰上的全是好人，對韓國印象很好，因此向同學推介，但他又說：「曾經有五、六個同學去，去到機場又俾人檢查行李；有啲唔禮貌嘅對待；換錢又俾人呃；去召妓又中花柳！」Kelly即說：「呢吓好傷喎！」
肥佬黎年輕時做毛衣，也在韓國生活過一段日子，對這國家有三個與別不同的觀感。第一，就是到處都有陣蒜頭味：「以前同邊個講話又係蒜頭味，𠵱家就冇咗。」第二，是韓國原來盛產天然美女，不用靠整容或化妝，他說：「你唔化妝平易近人啲，所謂accessible，好容易親近。」最後就是韓國男人愛打女人：「嗰時開會，啲韓國秘書做錯嘢，係兜巴冚！最恐怖。」當然這是三十年前的事，現在已沒這種風氣。
from:
http://hk.apple.nextmedia ... 131018/18468354
