已為人妻的名模Jocelyn及Cara G.雙雙大談婚姻經，新婚不久的Cara與老公Jesper「一擊即中」，完成Cara於30歲前生B的夢想。Jocelyn眼見好友懷孕亦非常替她高興，今年30歲的她未有因好友遲來先上岸而心急，依舊預計2年後才生B。
Cara（右）羨慕Jocelyn及Anthony常「夫妻檔」搵真銀。
出嫁後轉變……
J：首先一定要恭喜你！你同Jesper結婚半年就有BB，真係好戥你開心，依家你做咗人妻，又就嚟做媽媽，感覺有冇咩唔同？
C：結婚之後，最大改變唔係我，而係Jesper。因為佢來自一個破碎家庭，所以佢從來都唔相信婚姻，對佢嚟講結婚從來唔重要。但佢依家好似變咗另一個人咁，仲成日話：「點解我唔早啲結婚？我好鍾意做你老公！」總之就令我覺得成日都畀愛包圍住。
名模Jocelyn及Cara事業、婚姻兩得意。
J：真係好幸福啊。
C：哈哈，雖然依家修成正果，不過同佢一齊嘅7年間，我都試過崩潰。大概喺3年前，好多我身邊嘅朋友都陸續結婚，有好多拍拖嘅時間仲短過我，但係就爬晒我頭結婚，令我開始諗係咪自己有問題呢？嗰時真係好唔開心，所以決定離港去倫敦做嘢，仲同Jesper講叫佢唔好搵我。喺嗰兩個半月，我努力咁工作，好獨立咁生活，返嚟之後個人反而輕鬆咗，覺得結婚都唔係真係太重要。
互數求婚趣事
J：其實結婚呢回事，要發生嘅時候就會發生。記得當年Anthony同我求婚，真係覺得係佢對我做過最甜蜜嘅事！佢喺屋企地下用玫瑰花砌咗個心形，擺咗個盒喺中間，裏面放咗粒石。因為雄性嘅企鵝會送粒石畀心儀的雌性企鵝，如果對方接受咗，佢就會一生人只愛佢一個，代表佢係唯一嘅伴侶，係一生嘅承諾。而佢就將求婚戒指戴咗喺我當正係我BB嘅貓貓Simber條頸上面，我feel到佢放咗好多心思。
C：Jesper同Anthony可以話係完全相反！佢係我識得嘅人裏面最冇計劃嘅。佢有日突然帶我去菲律賓，去到先知原來乜都冇準備，連酒店都冇book！最後搞咗成兩粒鐘先搵到地方落腳。成個旅程我哋都冇咩目標，佢帶咗我去露營，又喺沙灘度起咗個火，我哋就自由自在咁喺沙灘度裸跑、裸泳，好開心！佢係個冇計劃到就連求婚都冇準備戒指嘅人！所以當佢話「嫁畀我」時，我仲以為佢講笑，不過咁先至係佢嘅風格。
談生育大計……
J：每個女仔都對結婚充滿憧憬，會想早啲結婚。不過結婚前一定要諗清楚！香港好多人都拍咗拖一陣就結婚，但好多時結完婚就對對方冇晒熱誠，搞到離婚率好高。
C：哈哈，其實我細個都講過要結十次婚！可能係因為我父母都離咗婚，佢哋又各自再婚，所以我去過好多次婚禮，以為結婚好好玩。其實我每次拍拖時間都唔短，我同Jesper拍拖之前，同個男仔都拍咗拖4年。呢刻，我相信自己呢生人只會結一次婚，就算真係要嫁10次，我老公都一定要係Jesper。
J：以我所知你哋都各有各忙，係咪呀？
C：老公之前去咗馬來西亞拍真人騷節目，我都要飛嚟飛去工作，好似啱啱嗰11日我就去咗米蘭、上海、北京、韓國4個地方！喺過去3個月入面我哋只係喺香港見過面一日，估唔到「一擊即中」，真係好意外！其實我一直都好希望喺30歲前生小朋友，我依家真係做到啦！如果負擔得起，都想生最少兩個。
J：我都想兩年後生兩個小朋友，其實我同Anthony都希望領養尼泊爾嘅小朋友，等佢哋都感受到愛同關懷。因為Anthony都係被領養嘅，如果當初冇人領養佢，就唔會有Anthony，我亦都唔會遇到我嘅終身伴侶。所以我哋有共識喺我哋嘅小朋友大個少少之後，我哋就會開始領養小朋友，等佢哋一齊玩、一齊生活、一齊成長。
口述：Jocelyn、Cara G.
筆錄：龔凱欣
服裝：REDValentino、MAX&Co.@ Hysan Place
From:
http://orientaldaily.on.c ... /00282_060.html
