曾志偉挖番一班唔係失婚就甩拖嘅熟女出山，幫無綫拍新劇《M Club》，其中包括啱啱四張嘅葉蘊儀，同李若彤、張慧儀佢哋拍埋一齊，離婚十幾年嘅葉蘊儀外表最輸蝕，所有師奶特質，無一遺漏。
上星期三（十八日），《壹》仔喺中環撞見葉蘊儀上salon整頭，一支水，一個化妝袋，帶齊裝備，完完全全師奶格！
不過咁，八珍對葉蘊儀二百分佩服！單靠自己一雙手，開校教手工藝，湊大一對仔女，仲要抽時間讀埋碩士課程，外表師奶，但內裡係強人。如果無綫要開《師奶強人2》，記住預佢！
上salon整頭，葉蘊儀又水又化妝袋，典型媽咪作風。
見到《壹》仔影相，笑！上世紀藝人，都比較有禮貌。
同李若彤、李麗珍、袁潔瑩、張慧儀等拍埋一齊，葉蘊儀最師奶，減廿磅會好好多。
