「宇宙最強」甄子丹百足咁多爪，上周五（20日）去完周董演唱會做嘉賓，又唱又彈鋼琴，耍埋雙節棍，周董仲大讚佢嘅琴技，之後佢話︰「咁大個仔第一次喺紅館做騷，第一次同周董同台演出，感受到自己係巨星！」查實丹爺太謙嘞！佢嘅巨星感受又邊只嗰一刻。
做完演唱會嘉賓，周日（22日）佢就去咗青島出席東方影都電影城嘅活動。丹爺一樣係巨星咁款，同荷里活巨星妮歌潔曼、里安納度狄卡比奧等一齊行紅地氈兼去party。佢仲以一貫「一打十」嘅身手，火速同咁多荷里活巨星影晒相兼放上網，一個字，強！
甄子丹做周董第七場演唱會嘉賓，唱歌又彈琴，表演埋雙節棍，台下甄太汪詩詩同對仔女睇到嘩嘩聲。
喺青島行完紅地氈當晚，甄子丹去咗party，同妮歌潔曼傾完偈，就同里安納度狄卡比奧合照，好威水呀！
甄子丹全程忙到暈，撞見李連杰又傾一輪，唔知以為佢係主人家。
