過去嘅「IQ考考笑」好多人都覺得無聊，但最後咪又引到大家咔咔笑。今期搵嚟小辣椒鄭融開咗條音樂題，擺埋樂壇天皇劉德華上枱，睇吓歌手同藝人邊個最快估中？
阿Bob：阿蝦定阿夏？
平時鬼馬又精靈嘅阿Bob（林盛斌），對呢條音樂IQ題完全唔使用腦汁就答中，仲俾多兩個答案媽咪姐㖭。果然係轉數快一族，下次可能要考佢物理題先得囉！
王菀之：哼！無難度！
平時斯斯文文嘅王菀之，一聽到要考佢IQ題，精神即時為之一振，仲要聽完個問題唔夠2秒鐘，就講得出個答案，完全唔需要貼士即時過關，係今期最快答中嘅一個。叻女！
朱慧敏：我俾佢飲？
傻大姐朱慧敏起初笑晒口話自己好有IQ，不過估咗三次都係離晒罩：「MV女主角……楊采妮？雷頌德？我~~俾佢飲？」足足估到第四次，冇提示下至答中，以藝人嚟講佢算叻喇，恭喜晒！
陳奐仁：男定女嚟㗎？
一心以為音樂題，搵番啲音樂人答實冇死啦！點知陳奐仁竟然一開口就問：「有冇貼士呀？男定女嚟㗎？」跟住就亂估係「王祖賢」（果然係《忽周》fans呀！）。最後俾晒貼士，佢答中都仲係唔多明點解，可能呢首歌唔係佢寫㗎啦！
林子善：識唱唔識答喎！
變咗黑黑實實大隻仔嘅林子善，好鬼留心聽晒問題之後就即時問攞貼士，之後就開始唱：「給我一杯忘情水，『溫』我一夜不流淚~~」雖然佢啲普通話真係唔係個個聽得明，但俾咗貼士後重唱一次就答中喇！
鄭融開估：呢個人咪係「阿霞」囉！「啊~吓~~~（阿~霞~~~）給我一杯忘情水。」（請用劉華腔唱出）
