腹痛入院嘅小菌，食得好清淡，肉都唔多嚿，難怪小菌個樣冇晒心機，快啲叫緋聞男友邵子風呵番啦！
又係歌手，又係補習天后嘅龍小菌，除咗面罩之後頻頻出席活動賺錢，近排仲錄音準備出碟喎！不過佢周日（6日）腹痛入院，小菌話摸到個肚有個杧果咁大嘅硬塊，除咗有發炎跡象，仲嚴重到起膿。
經過檢驗，醫生懷疑小菌俾嘢咬，細菌感染，已經俾咗消炎藥佢食。而小菌亦於周二（8日）下午出院，據知佢周三（9日）會「復課」教書，不過和音工作則另作安排，希望減輕工作量，爭取多啲時間休息。
其實小病是福，今次病倒入院咪當休息一下囉！小菌之前忙工作，仲一個星期打足幾日boxing減肥。媽咪姐早排先見佢喺新蒲崗一間拳館學拳，雖然唔係拳拳到肉，但都有姿勢。聽聞小菌學咗兩年，減咗足足三十磅，不過瘦都要keep住健康，媽咪姐喺度祝小菌早日康復，唱多啲好歌俾大家聽啦！
媽咪姐早前喺拳館見到小菌，當日佢包紮雙手再戴拳套，做足安全措施先跟教練練拳。
呢場女子free fight，拳館師姐作狀被打，𠱁得小菌好開心！
