跳水王后郭晶晶早排幫霍家生咗個乖孫，諗起霍啟剛手震震幫囝囝換片個樣，既搞笑又溫馨囉。其實奧運情緣又點止一單吖，當年葉璇代表無綫去採訪雅典奧運，喺唔夠一個月就同跳水名將熊倪極速撻着，都轟動一時。
事發喺04年嘅9月，香港例行公事搞埋晒啲乜乜「京港同心迎奧運」活動，而身為奧運跳水金牌選手嘅熊倪，就當然要出席啦，因為順便會一會佳人嘛。熊倪都好進取㗎，來港期間一得閒就爭取時間同葉璇見面，食飯、high tea、卡拉OK樣樣齊，仲不避嫌結伴睇劉華演唱會㖭。熊倪臨走嗰日，葉璇仲特別抽時間送行，只見兩人依依不捨，到入閘前一刻，兩人仲嚟個goodbye kiss，認真冤氣。點知轉頭唔夠兩個月，葉璇突然同記者講話唔想再提熊倪呢個人，戀情迅速玩完，套老夫子一句真係耐人尋味，但葉璇憑借呢段緋聞，接job都接到笑。
from:
http://hk.apple.nextmedia ... 130907/18412526
