謝霆鋒同栢張芝雖然已經離咗婚，栢芝仲帶埋兩個仔移民加國，希望囝囝喺不受打擾情況下長大，而栢芝本人就唔係退出娛樂圈，佢經理人話栢芝十月會拍新戲。要搵栢芝，仲搵得到。
不過，霆鋒胞妹婷婷日前就爆響口，話栢芝改埋電話號碼，搵佢唔到:「我都想關心一下，我冇佢電話，因為佢之前改咗電話，之前有o架。」仲大爆四哥同拉姑見到個孫:「我都幾個月冇見小朋友，月前送禮物畀佢哋，都係工人代Lucas喺微信覆我。」之後四哥接受訪問，都話原來佢一直都冇栢芝電話。
報道一出，栢芝fans馬上插爆婷婷、喺微博怒轟謝家亂講嘢。該微博「主理人」(即栢芝忠實fans)留言問道：「栢芝改沒改號碼，問栢芝的經理人，問栢芝的朋友應該更合理吧？」又質疑:「5月12到7月3號他們（栢芝與兩個囝囝）去加拿大之前這五十多天，孩子爸、孩子奶奶、孩子姑姑都哪去了？」就連栢芝幾時起程都知，係fans定自己人？
其實婷婷唔止一次受訪時，爆響口話見唔到Lucas同Quintas，更令人心酸係爆埋兩老想見兩粒孫都好難，但今次婷婷一反常態，馬上澄清，話係傳媒唔解咗佢意思:「我冇打過畀栢芝，我係話我同栢芝好少聯絡，唔知佢有冇改電話。」仲話希望大家唔好攞嚟炒作喎。明明係話栢芝改咗電話，都要硬生生話大家誤會咗佢，唔通因為受壓所致？
雖然霆鋒前晚已透過經理人霍汶希，佢一直都有同栢芝聯絡，但就連屋企人都唔知，故此希望大家(栢芝fans？)唔好令其家人同細妹難堪。但係栢芝fans唔肯罷休，見到婷婷嘅回應之後，噚日又寫道:「不要說媒體誤解你，你身為演藝世家的一員，跟媒體打交道這麼多年，能不知道媒體是抓字眼的麼？如果我們不提出來，你會按照慣例不聲不吭任由媒體繼續黑柏芝，讓大眾繼續誤解柏芝吧？這兩年來你們有意無意引起的這種事還少麼？消停消停積點德吧！」
from:
http://hk.apple.nextmedia ... 130907/18412973
