網民爆料指Tommy仔向原宿女神Eva借三百蚊開飯。
娛圈生命力頑強不死嘅阮民安（Tommy），總係是非唔停，佢耐唔耐就會爆一單錢銀轇轕，之前爭大耳隆賭債，跟住又嚟單欠租同BIGBANG演唱會飛走數，網民都叫佢做「擾民安」。噚日網上流出網民Eva Cheung喺facebook留言話唔見咗三部相機，咁啱擾民安又搭嘴，Eva被起底係原宿女神，仲話佢係擾民安同居七個月女友，旁邊又貼咗有段WhatsApp對話截圖，疑似擾民安向女方𢱑三百蚊開飯。
Eva喺fb大呻唔見相機，下面即有擾民安搭嘴：「我冇錢交租，又冇錢交電話費，XXXXXXX（電話號碼）停咗，我拎晒去賣，唔好咁樣公開，聽日去先達拎番。」不過留言好快刪走，旁邊又貼咗疑似擾民安問對方攞錢，佢話：「入住幾百蚊嚟開飯先？OK？……三百都好。」對方話：「我嘅生存唔係要畀錢你，你點X我，你點對我。」究竟件事係點，守庫噚日打畀擾民安，佢自稱已報案：「我啱啱為呢件事去咗警署備案，星期日我發現fb俾人盜用咗，我以前有個女助手，全世界都知佢好鍾意我，佢都知我好多密碼，可能我辭退佢，因愛成恨，入我fb亂寫嘢，我已報警備案，阿Sir形容呢件事『低能白癡反轉豬肚係屎』，警方話會處理。前助手幫我，唔通我要以身相許咩。」噚日警察公共關係科回覆話阮民安係噚日上午去九龍城警署報案。
Tommy仔不滿前女助手盜用佢fb，噚日自稱去報警備案。互聯網圖片
Eva被封原宿女神，但Tommy仔否認係女友，話只係工作夥伴。
擾民安否認冇錢開飯，佢話：「我三餐有飯開，有屋住，大家唔使擔心。」咁銀包有冇三百蚊？佢話：「可能得幾十蚊。不過我開咗新fb，大家唔使理舊戶口，如果大家覺得我好窮，就畀多啲嘢我做，等我有餐溫飽。」
場主：守庫
from:
http://hk.apple.nextmedia ... 131204/18535375
