B女黃鶯的出現，令朱茵和黃貫中（Paul）的笑容未停止過。由女神變潮媽，41歲的朱茵無論外貌、身材跟從前一樣，臉上添了幾分人母、人妻的味道。女兒黃鶯的來臨，令朱茵由徬徨變得踏實，與老公的目標亦一致，事事以女兒為先，讓她做個開心快樂的人，現在每分每秒感覺都是奇妙的、夢幻的。一向處理私事低調的朱茵，由懷孕、女兒出世、與女兒相處的點滴，都一一記錄下來，再編寫成書，與大家分享她難以形容的喜悅，朱茵更告訴大家，與Paul不只簡單註冊結婚，二人早已悄悄地穿上婚紗、禮服擺酒完婚，她的燦爛人生，現在才開始。
41歲的朱茵無論外貌、身材跟從前一樣，不過今日的身份已是人母。朱茵推出新書《6磅10安士》，記錄她由懷孕、女兒出世、與女兒相處的點滴。微博圖片
Paul一切為女兒着想，夜晚說話都要細細聲。
微博圖片
朱茵貴為90年代的女神，已升任媽媽了，很難想像一個唯美主義者，會不計較懷孕致身材突變，拿出勇氣迎接下一代。朱茵由懷孕到誕女期間，曝光率近乎零，甚至連大肚相都沒有拍下，可想而知，她是何等愛美。黃鶯是她最疼錫的寶貝女兒，朱茵在懷孕開始已將點滴記錄下來，《6磅10安士》就是她為女兒撰寫的一本書，日前朱茵在尖沙嘴接受本報訪問時說：「人越大好多嘢唔記得，所以用文字去表達我內心嘅澎湃感覺，𠵱家囡囡9個月大，見到佢出世一刻，真係淚流不止，佢一笑真係殺死我哋，望住佢每刻都好奇妙同好夢幻，我個肚竟然走咗咁大個人仔出嚟。」
驚嘆Paul遷就B女
榮升父母的黃貫中與朱茵，生活開始改變，朱茵說：「𠵱家乜嘢都以囡囡行先，夜晚喺屋企講嘢要細細聲，之前我哋跟奧比斯去尼泊爾探訪，亦輾轉考慮咗好耐，擔心我哋有乜嘢事，囡囡唔知點算，不過今次出門我哋重拾二人世界感覺，亦見到好多需要幫助嘅小朋友。」朱茵更特別稱讚老公說：「佢煙食少咗，咖啡飲少咗，有時佢會主動幫手餵奶，見佢唔捨得放手，呢啲係以前未見過嘅，一個咁man嘅男人要遷就一粒骰嘅人仔，好好笑，不過有時見Paul同囡囡玩飛、玩騎膊馬，我見到都驚，但我又唔想妨礙佢兩父女建立感情，惟有同自己講放手，唔好太緊張。」
Paul經常出埠工作，由朱茵獨力照顧囡囡，她說：「我知佢好掛住我哋，囡囡經歷嘅所有第一次，佢都希望一齊行，我會拍好多片或者視像畀佢知道，囡囡都遺傳咗爸爸嘅音樂細胞，鍾意聽好嘈嘅音樂，試過聽兒歌就瞌眼瞓。」朱茵一向是女神icon，她表示若劇本適合，不介意演媽媽角色，但為照顧囡囡，出埠工作會盡量縮短：「呢段時間永遠唔會有，𠵱家佢最需要媽咪，不過我未計劃囡囡將來做乜嘢、讀乜嘢學校，我只係想佢擁有快樂童年，做個開心嘅人，呢個係我同Paul嘅堅持，我唔會做怪獸家長，我𠵱家教佢，都係同佢一齊慢慢行、慢慢學。」可會反對囡囡將來入娛樂圈？朱茵說：「呢行要有天份，如果只係鍾意出鏡算吧啦，呢行真係辛苦，要有好強毅力，我主張畀佢自由發揮。」
Paul與朱茵早前跟奧比斯到尼泊爾探訪，笑言重拾二人世界感覺。
朱茵和Paul去年4月由馬來西亞返港，承認懷孕。
擺酒着婚紗做到足
懷孕期間，朱茵近乎零曝光率，又有說她懷孕時情緒起伏頗大，她說：「我唔想佢（Paul）受壓力，我真係希望佢自由自在。」被問到懷孕時有否刁蠻？朱茵說：「還好，我自己覺得還好啦，有時叫佢整嘢食，見佢辣親手不知幾心痛，後來我都唔敢再叫佢整。」
大家都知道朱茵與Paul已註冊結婚，但原來也有按傳統，穿婚紗及禮服悄悄在港擺酒，朱茵說：「我哋有搞婚禮，只係傳媒唔知箒，我班摰友、連酒店場地都好錫我哋，所以冇人知，都差唔多有20人㗎。」辦婚禮又是否朱茵的心願？她說：「老人家啦，未必好傳統，總之老人家開心，做咗令老人家開心嘅嘢，亦做晒我哋想做嘅嘢。」但朱茵拒透露擺酒時是否已懷孕，她說：「呢樣留番畀我哋keep番個秘密啦。」
場地提供：尖沙嘴北斗頂尊火鍋料理（The One）
from:
http://hk.apple.nextmedia ... 130831/18402495
