由英皇女新人許靖韻主演的微電影《歲月如歌》昨日首播，飾演「箍煲」機長的洪卓立向緋聞女友湯怡「隔空」大派定心丸，揚言與衛詩雅的「激烈床戲」確實安全，至於羅力威亦憑生鬼的演繹成功彈出，連英皇高層吳雨睇完都話有意撮合他與洪卓立，孖住開拍新戲！
洪卓立與湯怡合照尷尬，更拖埋衛詩雅落水先肯影相。
一眾英皇歌手羅力威、洪卓立、張致恒（Steven）、鍾舒漫（Sherman）、衛詩雅、湯怡、泳兒及新人許靖韻（Angela），昨日出席英皇娛樂《歲月如歌》微電影首映禮，英皇高層吳雨及經理人霍汶希（Mani）亦現身撐場，吳雨又話羅力威的「冷面笑匠」大受歡迎，有意捉埋洪卓立組成「鬼馬雙Sing」開新戲。
記者叫到洪卓立同「女友」湯怡合照時，兩人都顯得尷尬，要拖埋衛詩雅落水先肯影相，問洪卓立同衛詩雅的「激烈床戲」，可過到湯怡那關？洪卓立即「遊花園」表示：「大家都好ok，好安全，冇人投訴。」
洪卓立影完相即快閃走開。
羅力威與許靖韻於片中有咀戲。
英皇高層吳雨（右二）及經理人霍汶希（左）現身撐微電影首映。
Mani夥拍吳雨怕畀人笑
另一對緋聞情侶Sherman同Steven最初表現扭擰，但其後都任影，二人更互耍花槍，Sherman說：「男仔大方少少啦，仲怕醜過我，呢啲嘢唔使教啦？」Steven就還擊：「最麻煩係你，又唔拉住我影！」問到Steven點睇身穿大Deep V的Sherman？他識做地大讚：「佢點都靚！」另問Mani何解不客串？她抵死話：「之前秘書問我尺寸做空姐衫，我嚇到即刻買機票飛走，我唔介意做空姐，但我怕夥拍吳雨會畀人笑咋。」
許靖韻翻唱《歲月如歌》
提到羅力威同Angela的「咀戲」，羅力威澄清：「錫面咋，阿Ken啲床戲仲激。」而翻唱陳奕迅《歲月如歌》的Angela就揚言：「雖然有壓力，始終首歌太深入民心，我怕外界有比較。」另羅力威前晚出席活動時，被問可知緋聞女友雨僑將在電影中與林德信激咀？他說：「做嘢啫（唔介意分享女友？）當然唔係，大家專業嘅！」
from:
http://orientaldaily.on.c ... /00282_022.html
