無綫新劇《M Club》差唔多隔日就喺中環一帶開工，前日又見到李若彤、葉蘊儀、豹哥單立文同金剛喺中環蘇豪區拍攝。夜晚9點鐘左右，佢哋已經開始拍，起先個場口冇乜特別，講李若彤同葉蘊儀望住同一個方向，露出好驚訝嘅樣。拍完呢個鏡頭，佢哋好快亮出消暑恩物——手提電風扇同埋撥扇，之後坐喺自備坐椅嘅李若彤叫咗助手去對面間便利店買飲品，順便萬歲請工作人員飲嘢，買咗足足三大籃。
借位咀嘴
跟住就到豹哥同金剛埋位，而兩位女士點解要驚訝嘅謎底亦解開咗！原來金剛男扮女裝，仲要戴金色假髮、着魚網絲襪同高踭鞋，淨係扮相已經令人噴飯。劇情講述豹哥同男扮女極重口味嘅金剛拍拖，行到一半豹哥要幫金剛搽口唇膏都仲未夠，仲要錫佢塊面。但導演依然覺得口味未夠重，要豹哥同金剛咀嘴，當然最後係就位搞掂，不過兩個大男人拍完呢個借位kiss嘅鏡頭，已經笑到停唔到口。
金剛前晚戴住金色假髮，又着魚網絲同高踭鞋，好重口味啫。單立文喺劇入面同金剛拍拖，仲要錫佢塊面。
單立文幫金剛搽唇膏，認真攞命！
現場有個同金剛打扮一模一樣嘅女替身，唔係有乜嘢危險動作，而係導演嫌金剛腳粗唔似女人腳，所以要出動替身。
另外，金剛力撐女友陳蕊蕊鬧爆前度陳偉成（Avis），前晚Avis喺微博話：「受夠了，我們投降啦，享受吓籃球生活，離開你的魔鬼生活。」
採訪、攝影：李志明、梁繼光
李若彤「萬歲」請工作人員飲嘢。
埋位前，葉蘊儀先喺車上補妝。
from:
http://hk.apple.nextmedia ... 130822/18388796
