余文樂前晚為籃球隊橫洲工業喺灣仔修頓球場打邀請賽，而另一藝人球員周柏豪就因為工作未能到場。見樂仔賽前冇乜表情，非常認真咁去準備賽事，而喺賽事入面雖然有唔少火爆場面，不過樂仔都保持冷靜，仲第一時間出嚟勸交！
狀態大勇嘅樂仔全場攻入16分，帶領球隊順利贏波晉級。而本來事先張揚唔做訪問嘅佢唔知係咪贏波心情好，所以完場後都有停低接受記者訪問，佢話呢排為公司開嘅新戲做準備，多咗時間去練體能，至於場波有啲火爆？樂仔就話：「有少少啦，因為係淘汰賽，大家都好緊張，打波唔好有唔開心事。」
樂仔前晚賽前練波時非常認真，唧都唔笑！
張繼聰（右）同Dash出席籃球活動記者會，張繼聰仲騷佢隻傷指。
張繼聰手指重傷
對於舊愛吳雨霏（Kary）被指變臉，樂仔就好認真咁話：「報道好無謂，唔希望報章雜誌寫呢啲嘢去傷害藝人，我都幾唔開心但唔會多講，我好反對囉。」至於有冇傳短訊安慰Kary？樂仔就話私人嘢唔講喎！
另外，張繼聰同Mr.成員Dash等噚日喺旺角出席籃球賽事發佈會，張繼聰右手食指受傷，佢話：「早排拍唱片封套嗰陣打鐵，俾嚿鐵𠝹到見筋。」
from:
http://hk.apple.nextmedia ... 130812/18374384
