謝霆鋒封鎖迅息，開工行蠱惑

謝霆鋒同張栢芝離婚後，鮮有傳緋聞，近日終於爆出「迅鋒戀」，傳出霆鋒同周迅因為同樣愛Rock Music而一拍即合，周迅仲搬到同霆鋒一幢大廈住，方便日見夜見！當事人未有親身為緋聞解畫，不過工作如常，近日霆鋒同周潤發、杜汶澤等人拍緊由王晶執導、劉偉強監製嘅新戲《賭城風雲》。

霆鋒前晚同阿澤、孟瑤等人喺葵芳一間酒樓拍外景，睇個場景就估到係講兩幫蠱惑仔講數，霆鋒跟住打扮似大佬嘅無綫「卡拉之星」王俊棠去酒樓講數，不過齋睇霆鋒嘅衣着，佢着住背心、外套同迷彩三個骨褲，再襯埋副黑框眼鏡，外形就一啲都唔似蠱惑仔，反而似有為青年，真係搞笑。

霆鋒前晚喺葵芳拍戲，雖然佢冇答任何嘢，不過依然好chok咁打招呼。霆鋒頭耷耷咁跟喺王俊棠後面，似乎係做𡃁喎。

噚晚場戲講架的士撞入店內，搞到周圍碎片。

獲國際星級款待

咁多星喺度拍戲，吸引好多街坊圍觀，連警察都過嚟望兩眼。而酒樓外面塊玻璃貼住「提防爆炸小心玻璃」，原來噚晚有場的士撞入酒樓嘅戲，不過演員冇份演出。今次套戲有國際巨星發哥，帶挈埋霆鋒同阿澤都享受荷李活星級款待，現場有架白色大車，原來係畀演員上去休息化妝，仲有埋沖涼房。

前晚11點幾，霆鋒換完衫就坐番自己車走，不過佢冇答任何嘢。雖然霆鋒冇答「迅鋒戀」，依然有好多消息傳出，好似話霆鋒喺北京有私竇方便同周迅見面，跟住霆鋒嚟緊又缺席做內地嘅《快樂男聲》評審，不過助手話係因為有工作，唔係要避緋聞喎。

另外，霆鋒噚日又喺葵芳拍戲，睇嚟心情唔錯，問到同周迅嘅緋聞？佢笑笑口話：「唔講喇，都冇嘢講！」同場嘅阿澤就話最快下星期先同發哥一齊開工。

採訪：何慧斯、張俊銘

孟瑤着得咁密實，差啲認唔出囉。

阿澤喺架大車內拍照留念。互聯網圖片
from:http://hk.apple.nextmedia ... 130807/18366901

謝霆鋒、杜汶澤、孟瑤、許紹雄與王俊棠等昨於葵芳封街拍攝王晶執導新片《賭城風雲》（暫名），吸引近百人圍觀。雖然近期霆鋒被傳跟周迅拍拖，但無損其心情，昨穿上背心露麒麟臂的他，笑容滿面，被問到與周迅之緋聞時，他說：「唔講，冇嘢好講。」之後便開始工作。昨日拍攝一場的士撞舖頭戲，雖然霆鋒只是舖頭座上客，但他也很用心，於食肆落地玻璃窗前與工作人員不停比劃。

霆鋒穿背心露麒麟臂，心情並未受緋聞影響。

眾人拍攝前亦有拜神求平安，阿澤則預備了一箱飲品予工作人員及記者飲用，十分細心！阿澤直言開工至今，還未跟周潤發做對手戲：「可能去澳門先有佢。（霆鋒出名chok，有冇chok親你？）冇，佢負責型嘛，學發哥話齋，佢負責動作，我負責搞笑。」而前晚霆鋒與阿澤等亦在同一地點拍攝一場後巷追打戲，霆鋒完成戲份後，匆匆換回便服踢拖離開。

的士撞舖頭場面驚心動魄。

阿澤化上受傷妝拍新片，維肖維妙。
from:http://orientaldaily.on.c ... /00282_015.html