近年一直看淡本港樓市並異常看好內地市場的恒隆地產（101），其主席陳啟宗昨日態度突變，坦言內地租賃市場已跟香港樓市一樣將進入寒冬，香港已感到「冬天的氣味」；集團在港雖囤近1,400個單位，惟他指恒隆「冇驚過」，因集團鍾意「擁抱熊市」。
記者：陳新政 陳健文
陳啟宗昨日在業績會上罕有地表示，內地市場將進入寒冬，但仍力撐恒隆在內地的商場較高檔，受影響的程度較低。
力撐系內商場影響微
他說，「有啲行業係fungible（可替換），但高檔商場就唔係，而且商場初初開幕需要時間經營，上海兩個場開咗12、13年，所以貢獻係比較大，但其實𠵱家開新場回報都唔差，好似瀋陽首年回報都有9%，上海嗰場當初只得5%。」儘管新場需要時間體現回報，但陳啟宗在會後補充指，今年底內地租金收入仍有望保持雙位數增長。
對於恒隆半年內地租金收入增長放緩及陳氏的「寒冬論」，有中資分析員認為，內地租務市場未到最差的情況，「其實剛簽落的租金係唔會變，即係點都有增長，只係會放緩，不過內地經濟咁差，賣日用品嘅大眾商場就唔受影響，高檔商場租金肯定會跌，年底應該放慢到得單位數增長。
恒隆股價已反映咗業績，短期內仍然會好弱。」另一位外資分析員亦認為，由於內地今明兩年有大量大型商場落成，競爭將會十分競烈，預料9月開幕的無錫恒隆廣場，首年回報只得約7%。
香港方面，恒隆今年初披露在君臨天下及浪澄灣等住宅囤積近1,400個單位，陳啟宗2月時表示受政策影響，恒隆其實是「被囤樓」，想賣卻賣唔出，結果半年後的確只售出5個單位，陳啟宗昨日再次大嘆自己錯失了兩次賣樓機會，「09年想賣，但遇上經濟差，股市大跌。之後舊年印好晒售樓書，又SSD（買家印花稅）……我覺得過去兩、三年賣高價樓嘅機會已經有限，香港樓市已經有冬天的氣味。」
嘆樓市辣招辣到標淚
陳啟宗又強調，香港樓市步入冬天，是因政府短期內不會撤走樓市「辣招」，「因為社會上太多聲音唔想地價升得太快，所以唔會撤走辣招。」他更形容現時的辣招已「辣到標眼淚」，因此不用再「加辣」，被問到會否擔心1,400個貨尾賣唔出，他僅回應指，「睇吓係要價定要量，恒隆物業位置好，冇話賣唔賣得出。」
陳啟宗雖認為香港樓市進入冬天，「但距離『嚴冬』仲有一排，如果真係嚴冬，我哋唔會驚，因為恒隆鍾意擁抱熊市，到時就會出手買嘢，但相信大家都唔想見到恒隆買地。」
對於李嘉誠旗下和黃（013）出售百佳被市場視為撤資，陳啟宗認為做生意好簡單，「邊度回報多就去邊度，好似香港環境唔啱我，咁多大鱷，恒隆咪返大陸玩。」
from:
http://hk.apple.nextmedia ... 130801/18359100
