自從同胡杏兒分手，32歲黃宗澤近期專心工作，雖然在《勁歌優秀選》走音，被網友剪片恥笑，但總算保持到人氣。
出碟有難度、宣傳完《好心作怪》，新劇又未開，Bosco趁有空檔為自己首間蠔吧睇鋪。上週三（10日），Bosco與經理人揸車落九龍城南角道，同場還有兩名地產經紀傍實，唔使1粒鐘，Bosco已拎住大疊文件離開，據知Bosco當日決定扑鎚簽約，總投資400萬。
陳豪試過開鋪損手，不過Bosco有信心唔會出事，仲話︰「阿媽幫手睇住，唔怕俾人呃！」
年前Bosco開始在馬來西亞怡保投資酒吧OverTime，但去年離奇結業，其後再投資300萬在同一位置開新鋪The House，同樣做酒吧，現時繼續營業中。舊店唔夠1年執笠，Bosco死撐冇蝕錢，「之前間OverTime唔算失敗，做咗兩年已經回本，只係想轉型啫！」
阿媽揸數與母親感情要好，Bosco話所有物業、股票都會交由黄媽媽管理，現時兩母子已有3個沙田銀禧花園單位，連1個車位，市值約1,400萬。
上週三，Bosco落九龍城作最後巡視，見到記者影相表現愕然，十問九唔應。
《忽然1周》圖片
1粒鐘扑鎚
Bosco雖然已同胡杏兒分手，但月前仍然被TVB擺上枱，企埋一齊宣傳2014世界盃。《蘋果日報》圖片
遙距投資都冇出事，心雄Bosco更有決心想在香港做老闆。一向是「蠔」癡的Bosco，據聞每星期都會食蠔，無論打邊爐或生蠔都唔放過，身邊朋友仲經常取笑他要食蠔壯陽，而Bosco早前已透露有興趣開蠔吧，終於的起心肝落實新店位置。
上週三下午，Bosco揸住價值約125萬的Audi RS5跑車，到九龍城南角道睇鋪。一落車已有兩名女經紀笑晒口等大明星到場，Bosco與經理人及助手立即行入一間落了鐵閘的鋪位，其間不斷出入視察鋪內外環境，相當仔細。睇足1粒鐘，Bosco即上車走人，離開前更從經理人手上接過大疊疑似租約文件。
睇中九龍城2千呎鋪Bosco多次出入鋪頭視察，經紀亦細心服侍。鋪位設有閣樓，方便Bosco整VIP房招呼圈中朋友，據知上手係做參茸海味生意！
Bosco由鋪頭行出嚟，兩位女經紀（中、右）已笑晒口對望，明顯做成生意！
TVB經理人Human（右），陪完簽約後即刻將文件交番畀Bosco保管。
10月頭開張據知Bosco的新店地鋪連閣樓面積約2千多呎，月租約6萬，今次Bosco是以低於市價承租，「佢（Bosco）係熟人介紹，前前後後睇咗3、4次㗎喇，早兩日終於扑鎚簽約。佢把口真係啷過油，猛同業主講價，又話會搞間好高級嘅蠔吧搞旺條街，氹到個業主肯減價租畀佢！」知情人士透露。
租到筍盤，Bosco週一（15日）接受本刊電話訪問時，承認已落實蠔吧鋪位，「九龍區好！間鋪大約2千幾呎，大馬間酒吧已經回咗本喇，所以今次都投資咗400萬左右！預計要裝修2個月，希望9月尾10月頭開到張啦！（怕唔怕步陳豪後塵被呃？）阿媽會幫手睇住，唔怕俾人呃！」
Bosco去年親自飛大馬為酒吧The House（右圖）剪綵切燒豬，據知蠔吧繼續由大馬酒吧的股東投資，有錢齊齊搵。
食蠔唔壯陽成日話男士食蠔可以壯陽，但根據家庭醫生關嘉美指出，呢個說法其實係一個謬誤，「蠔的確含有豐富蛋白質及礦物質，如果一個人吸收到，會幫助製造精子；但精子數目多並唔代表係壯陽！假設一個人有慢性疾病、又煙又酒都會導致不舉，咁舉唔到就多多精子都冇用啦！另外如果啲蠔唔乾淨，食到又屙又嘔都係嘥氣！」
開鋪未必好藝人開食肆的確比普通人更有號召力，不過假如遇人不淑就分分鐘被利用甚至呃錢，真係有辣有唔辣！
反面 陳豪
11年與友人在大馬開咖啡店，但忙住拍劇唔得閒理，結果被拍檔呃錢，短短1年玩完。
擴充 林子善
與朋友去年合資150萬在大坑開「龍鳳冰室」，今年再揼180萬在灣仔開分店，雖然未回本，但林子善話已做到收支平衡！
執笠 喬寶寶
11年同朋友夾份在筲箕灣東大街開「千福大少」，專賣咖喱及海南雞飯，可惜去年頂唔住要執笠，喬寶寶更蝕了10萬離場！
